●8 nyied, daj Bwzgingh cienz daeuj siusik ndei, bonj sawcuenh raez《Mizmaj Giuzfuk》youz boux cozgyah Sanhgyangh Dungcuz Swciyen heuhguh Moz Cinyungz sij de ndaej Cunghgoz Cozgyah Hezvei dinghguh 2014 nienz daengx guek saujsu minzcuz vwnzyoz cungdenj cozbinj bangfuz hanghmoeg, neix dwg 2014 nienz daengx guek boux cozgyah Dungcuz dog ndaej bangfuz.

(Gungh Bujgangh)

●Geij ngoenz gonq, Nanz- ningz Si okdaiz fangh’an, dajsuenq moix bi daihgaiq senj 64 boux gohgi dwzbaiyenz daengz gij yienh(gih) gungzhoj saujsu minzcuz comzyouq de, hopheux gij hong guh canjyez daeuz nem miz daegsaek, sawj gohgi fatok cozyung, vih gij dieg neix daezhawj bangcoengh.

(Veiz Yenzfuz)

●8 nyied, Mungzsanh Yen Cangzbingz Yauzcuz Yangh Nanz- dung Cunh diuz roensuijniz doeng mbanj guh baenz lo, diuz neix raez 8 goengleix、gvangq 4.5 mij, gungh roengzngaenz 496 fanh maenz, neix dwg aen yangh neix 5 aen cunh ndawde diuz roensuijniz doeng mbanj ceiq laeng de guh baenz ndaej yungh. Neix soengq huqlaex hawj 30 hopbi yanghgingq.

(Luz Yungjfangh)

●Daj 2008 nienz daeuj, Nanzdanh Yen youq Lijhuz Yauzcuz Yangh Vaizlij、Lijhuz、Yauzlij 3 aen siujyoz nem Lijhuz Cunghyoz hai aen ban swnjcienz vwnzva minzcuz, moix singhgiz hwnj song dangz goq swnjcienz, swnjcienz gij dinfwngz nyibguh ndangdaenj Bwzguyauz、foux conzdungj minzcuz、 dwk nyenz nem dijyuz conzdungj daengj.

(Fuz Lungzgyangz)

●Lingzyinz Yen bi’gvaq gungh miz 8 aen yangh(cin) dajndaem 580.42 moux dienzcaet. Ciuq Lingzyinz Yen Nungzyezgiz fugizcangj Yi Yiz lwnh, aen yienh neix bi’gvaq dajndaem dienzcaet gungh ndaej Lingzyinz Yen Nungzcunh Sanghyez Yinzhangz Daigvanj bangbouj 880 fanh maenz.

(Vangz Yenzyungz)