Moix baez raen duzroeg youq gwnzmbwn mbin bae mbin dauq cwxcaih dangqmaz, gou couh gig hozhaenz, gou geijlai maqmuengh swhgeij couh dwg duzroeg rox mbin haenx ha!

Danghnaeuz gou bienqbaenz duzroeg iq, banhaet, gou aeu lizhai aen hawsingz ranzlaeuz ndaetcupcup youh hwngq hoengheiq youh uqlah neix, mbin daengz ndaw ndoeng faex mbwncupcup haenx diem heiq moq, ciengq gij go ndeidingq haenx, heuh gyoengq baengzyoux iq daeuj gwnz ngafaex bi nungxnengh. Ngoenz mbouj hwnjdangz, mwh daxmeh damzbedbed heuh gou guh cozyez seiz, miz raq rumz he ci daeuj, gou couh bek fwed mbin byaij lo, rwz gou caiq hix mbouj dingqnyi daxmeh damz. Gyanghaemh, gou aeu caegcaeg mbin daengz aen cauhsi doxgaiq youh lai youh nauhyied, bang duzdoengz dahcej cawx va camx gyaeuj, bang daengngoenz daxgoeng cawx yinjliu, caiq bang ndaundeiq daegnuengx cawx di saejdaeuz.

Danghnaeuz gou bienqbaenz duzroeg iq, moix ngoenz bae hagdangz couh mbouj yungh daxboh daxmeh soemh fwn soemh rumz soengq gou donj gou, gou cij yungh bek fwed couh ndaej mbin daengz hagdangz, cuengqhag youh mbin dauqma ranz. Danghnaeuz gou bienq baenz duzroeg iq, seizhah gou yaek mbin daengz henz haij, youq gwnz dansa unqnemnem haenx youzbyaij, youq gwnz haij mbin hwnj mbin roengz. Danghnaeuz gou bienq baenz duzroeg iq, baez daengz seizcou gou aeu boux daih’it mbin haeuj suenmak bae, cimz gwn gij mak vandiemz haenx. Danghnaeuz gou bienq baenz duzroeg ndeu, gou lij yaek mbin bae Nanzgiz yawjyawj, caeuq duz gioz guh baengzyoux. Danghnaeuz gou bienq baenz duzroeg iq, gou yaek dauqcawq mbin, bae gizneix yawjyawj gizhaenx yawjyawj, yawj gizlawz deng raemxdumh rox- naeuz dengrengx, yienzhaeuh gibseiz naeuz hawj vunzloih, hawj gyoengqvunz miz seizgan cinjbi ndei dingj cainanh. Danghnaeuz gou bienq baenz duzroeg iq……

(Siujhuj)