Roegga caeuq roeggacak dwg doiq baengzyoux ndei ndeu.

Ngoenz ndeu, songde dingqnyi roegvenz daxheiz ciengq go gig ndeidingq, couh hozhaenz lo, siengj caeuq roegvenz daxheiz hag ciengqgo.

Roegvenz daxheiz nyinhcaen son songde haujlai nanz, hawj songde sawq ciengqciengq. Roegga ciengq, “a a a”, sing hep raixcaix. De “e” ae sing ndeu, haenqrengz ciengq, sing hepsatsat sekyanyan, hwk ndaej vunz dwglau, yakdingq raixcaix. Roeg- gacak hix cij rox heuh “ca ca ca ca”，gaenbonj ciengq mbouj baenz go. Songde simnyap raixcaix, gvaiq swhgeij singyaem mbouj miz yungh. Roegvenz daxheiz gangj:“Moix cungj roeg singyaem cungj mbouj doengz, hoeng cungj miz yungh.”

Roegga caeuq roeggacak siengj bae yawjyawj duzroeg wnq singyaem miz maz yungh.

Songde yawjraen roegenq youq gwnzmbwn mbin bae mbin dauq, ndaw bak nam gijmaz, couh mbin gvaqbae, cam: “Roegenq dahcej, mwngz nam gijmaz?” Roegenq naeuz:“Gou cingq lwnh gyoengqvunz, seizcin daeujdaengz lo.”

Songde riengz sing ra raen roegvaiqguhvaiqguz, cam:“Roegvaiq- guhvaiqguz daxau, mwngz swenj gijmaz?” Roegvaiqguhvaiqguz naeuz: “Gou coi gyoengqvunz aeu vaiqguh hongnaz lone.”

Songde caengz rox wnggai baenzlawz hawj singyaem swhgeij engq miz yungh, hoeng, roxnyinh itdingh aeu bang vunz guh di saehndei cij ndaej. Ndigah, couh mbin laj doenghnaz bae, gaeb daek gaeb non gwn, bang vunz hen doenghgo.

Ngoenz ndeu, songde mbin ma ndaw mbanj, raen vunz luenh ndek nyapnyaj, youh uq youh luenh, lij miz gaeq dai bit dai doengh gij seihaiz doenghduz, haeungaungau, yienghneix roengzbae couh aeu baenz binghlah lo. Roeggacak daenj fan dox hau hwnjdaeuj, aeu bae ceih nyapnyaj, de doq mbin bae doq swenj heuh, siengj daezsingj gyoengqvunz aeu gangj veiswngh, hoeng sing de bingzbwd unqnub, gyoengqvunz cungj mbouj haeujsim. Roegga youh gip youh saetmuengh, de goq mbouj ndaej youh uq youh haeu, mbin gvaqbae doq gyan gwn gij nohhaeu, doq haenqrengz swenj, siengj hongz vunz singj. Sing de youh hep youh sek, hawj vunz gamjdaengz yungyiemj、dwglau、siliengz. Daihgya roxsingj lo, cungj okdaeuj ceih nyapnyaj lo.

Roeggacak raen gyoengqvunz roxsingj lo, angq ndaej heuh hwnjdaeuj. Dingjlingz, baenz nanz mbouj fwndoek, seizneix fwndoek lo. Gyoengqvunz angq dangqmaz, gangj:“Duzroeg daenj dox hau neix mbouj dwg lwnh raeuz yaek fwndoek luma? Caen dwg duz roeg ndei ndeu ha, de daeuj bauq heij ne!” Roeggacak dingq le, fwt singj lo, rox swhgeij wnggai baenzlawz guh lo.

Doeklaeng, de roengzrengz hag rox yawj dienheiq, ra gij gofaex sang giz gyawj vunz haenx cauh rongz, cienmonz bauq dienheiq、 bauq heij hawj vunz. Vih guh geiqhauh, fan dox hau de couh caiq hix mbouj duet roengzdaeuj gvaq, cig daengz seizneix lij daenj dwk.

（Ganh Sozvwnz/甘说文）