“Genbauj, raeuz dwg baengzyoux laux lo, gaej yienghneix gangj. Mwngz dwg boux binznungz gaenx guh lauxsaed ndeu, dou gig haengj youq ranz mwngz. Raeuz cungj dwg lwg lajmbanj, ranzmbanj gou doenghbaez caemh hoj lai, dou gwn ndaej gvenq, mwngz cuengqsim. Dou mazfanz ranz mwngz lai lo.”

“Mazfanz gijmaz, hawj ranz gou miznaj lai lo, dou gouz cungj nanz ndaej bw! Cijdwg sou ndwenndwen cungj gyau ngaenz, dou youh mbouj miz gijmaz cawj hawj sou gwn, najmong lai.”

“Dou youq ranz mwngz youq, couhdwg ranz vunz ndeu, ranz vunz ndeu mbouj gangj vah song ranz. Gij ngaenzgwnngaiz dou gyau haenx, sou mbaet yungh, dawz bae cawx gyu cawx youz, hawj lwgnyez hwnjhag cawx saw caeuq gaiqdoegsaw, heuh lwgnyez ndeindei doeg saw.” Cawjranz dingq le gig gamjdoengh. Seizhaenx, gunghcozdui gvidingh, ndwen boux gyau 9 maenz ngaenzgwnngaiz.

Veiz Gozcingh youq Liengz- dungz, cungj dwg naemj gij naemj vunzcungq, gip gij gip vunzcungq, gij haemzhoj vunzcungq, de yienghyiengh cungj gvansim daengz.

Haeujdiemj mbouj geij nanz, de fatyienh mehyah Vangz Genbauj rap rap haeux bae nienj baez ndeu, aeu yungh geij aen cungdaeuz. Baez cam, cij rox seiqhenz cijmiz aen cangj- nienjhaeux ndeu, baedauq yaek aeu byaij geij leix loh. Bae nienj haeux vunz youh lai, aeu baizdoih caj. Nienj baez, ceiqnoix aeu yungh buenq ngoenz. Vangz Genbauj caeuq mbangj vunzcungq fanjyingj hawj de naeuz, Liengzdungz geij bak hoh vunz, dan dwg nienj haeux, bibi cungj deng sai bae haujlai lauzdungliz, danghnaeuz miz dienh, youq baihhenz guh nienj haeux daengj cangjgyagoeng, couh ndaej hawj daihbaj lauzdungliz daj gij hong gyagoeng doxgaiq nungzfu ndawde gaijfang okdaeuj. De nyinh- naeuz aen yigen neix haemq ndei, ginggvaq caeuq Ho Yiyenz、Dwng Veizco daengj goengdaeuz gungh- cozdui, lijmiz caeuq gij sedui ganbu Liengzdungz lai baez doxyaeng, caemhcaiq ceng ndaej mizgven bumwnz doengzeiq le, cix daj muengxdienh rag dienhsienq daengz Liengzdungz.(caengz sat)