Sai：Daj ndij nuengx guhyoux

Ngeix daengz couh raen ngaeuz

Nuengx naengh youq henz saeu

Daengx ndang aeu ing beix

Sau：Daj ndij beix doxlienh

Gienh saeh ndeu mbouj lumz

Nuengx naengh youq gwnz rum

Beix umj ndang mbouj cuengq

Sai：Song raeuz gap baenz doiq

Van lumj oij ndwencieng

Song ranz gek diuzmieng

Bae mbouj bieng mbouj vaiq

Sau：Gag boux youq gag deih

Siengj beix mbouj raen vunz

Saehgaeuq seizseiz un

Mboujyawz cunz raennaj

Sai：Siengj nuengx sim lumj feiz

Mbouj ndei lai cienz vah

Ngoenz mbouj raen nuengx naj

Haemh ninz ma gikcak

Sau：Mbouj raen beix simyou

Bouxdog youq simdiuq

Hwnz ninz mbouj baenz ndiu

Ciuhvunz nanz ndaej gvaq

Sai：Guhyoux ndatfwdfwd

Lumj haeuxcid daem ceiz

Doxnem youh doxei

Aen’aen ndei youh lig

Sau：Song raeuz caemh guhyoux

Ngoenzlaeng couh caemh ranz

Vunz cam nuengx mbouj han

Dan deq beix hai bak

Sai：Gyaez nuengx cingz naekna

Lumj haeuxmba nem daengq

Ninz mbouj ndaek hwnq naengh

Gwn mbouj daengz dungx iek

Sau：Ndiep beix mbouj raennaj

Bienq mbungqmbaj daeuj cim

Song raeuz it diuzsim

Gim vuenh hix mbouj haengj

Sai：Song raeuz gamjcingz ndei

Cingzeiq laeg lumj mboq

Ngoenzlaeng dai caemh moh

Yaemgan goj vuenyungz