Daudwz ndei, couh lumj duj fwj hau gwnzmbwn lamzsisi, hawj swnghhoz raeuz dem le geijlai gyaeundei.

——Daezgeiq

Miz vunz cam:“Swnghhoz mwngz noix gijmaz ne?” Gyoengqvunz hoiz- dap gakcungj gakyiengh, gou nyinhnaeuz ndaw swnghhoz noix daudwz ndei. Danghnaeuz gyoengq- raeuz bouxboux cungj gangj daudwz, swnghhoz raeuz couh engq gyaeundei lo. Gij saeh ngoenzhaenx caen hawj gou gamjdoengh lo.

Gij Hengzdoengh Ndaw Fwn

“Sam nyied sam”dwg ciet Bouxcuengh raeuz, ngoenzhaenx miz haujlai bouxhek daj gak dieg daeujdaengz Vujmingz, daeuj caeuq gyoengqraeuz caez gvaq ciet, daengx aen singz Vujmingz cungj yienj ndaej gig nauhnyied.

Ngoenzhaenx gwnzmbwm fwnsei lumj bwnvaiz mbinfifi, gou gang liengj gag byaij youq gwn loh, giceh youq gwnz loh fwt bae, gij raemxfwn sinz hwnjdaeuj yiengj sasa. Henz loh miz boux daxgoeng byoemhau ndeu, de daenj buhfwn dwk, gij raemxfwn swnh buhfwn lae daengz dinvaq de. Hoeng de mbouj dawzhaeujrwz saek di, de gungjhwt dwk gip gij nyapnyaj henz roen, yienzhaeuh baez yamq baez yamq byaij bae coh aendoengj nyapnyaj, yienj ndaej gig dwgrengz. Yawj daengz neix, gou siengj:“Gou dwg boux hagseng, nanzdauh mbouj wnggai vih aensingz gyaeundei okrengz ma?” Gou swnhfwngz hix gip gij nyapnyaj henz ndang cuengq roengz aen doengj cuengq nyapnyaj haenx bae.

Goenglaux haenx gij hengz- doengh de hawj gou gamjdoengh, gou vih bonjfaenh dwg boux hagseng gangj vwnzmingz ndeu gamjdaengz ndaeng- moj.

Roxyiuj

Fwn ciemhciemh dingz lo, daengngoenz loh’ok fajnaj, gwnzhaw vunz lai dangqmaz, giceh byaij bae byaij dauq, goenglaux haenx vanzlij youq henz loh gip nyapnyaj. Miz doiq hauxseng ndeu miz gangj miz riu byaij gvaqdaeuj, gyoengqde swnh- fwngz gveng nyapnyaj, baetbaet fwngz couh yaek byaij bae gizgyae, goenglaux yawjraen le, byaij gvaqbae gip dawz gij nyapnyaj, laengz gyoengqde:“Hauxseng ha, mwngz baenzlawz luenh gveng nyapnyaj ne? Ngoenzneix dwg ciet ‘sam nyied sam’, mbouj ndaej vaihnaj vunz Vujmingz ha!” Hauxseng najmong lo, vaiqvet gip gij nyapnyaj henz ndang hwnjdaeuj, goenglaux haenx yawjraen le, fajnaj yiemzsuk haenx gaenq bienq ndaej unqswnh riunyumj lo.

Gij hengzdoengh goenglaux hawj gou gig gamjdoengh, gou rox le, baujhoh vanzging yaek baengh daih- gya, hix dwg gij cwzyin gyoengq- raeuz.

Daudwz Ndei Ciengz Youq

Muengh aen ndang byombeng- beng haenx, gou sawqmwh gamj- daengz goenglaux dwg yienghhaenx hungmbwk, yienznaeuz gij hengz- doengh de mbouj suenq gijmaz, hoeng de yungh cik fwngz de baujhoh “ranz” raeuz, baujhoh vanzging gyaeundei raeuz. Seizneix, vanzging yied daeuj yied ca, ndaw hoengheiq PM2.5 yied daeuj yied sang, danghnaeuz gyoengqraeuz caiq mboujrox baujhoh vanzging, mbouj gvaq geijlai nanz, gyoengqraeuz lienz “ranz” cungj mboujmiz lo.

Sevei cingqcaih mboujduenh fazcanj, seizdaih couh yaek gyau daengz ndaw fwngz gyoengqraeuz, gyoengqraeuz wnggai doxgiet youq itheij baujhoh vanzging, baujhoh “aenranz” gyaeundei gyoengqraeuz, sawj mbwn engq lamz, raemx engq saw, dieg engq cengh、 engq heu.

Ngoenzhaenx gou caen gamj- doengh lo.

（指导老师：陆全耀 林锦凤）