Roeggumj iq youq ndaw doenghnaz, de gig maij youq ndaw doengh youz bae youz dauq, yawj funghgingj gyaeundei, lij haengj ciengqgo diuqfoux.

Ranznden de dwg nounaz, duz iq neix mbouj maij gangjvah, engq mbouj yungh gangj ciengqgo diuqfoux lo，di yinx ndeu hix mbouj miz, cij haengj mbon congh caux rongz. Roeggumj mbouj maij de saekdi.

Seizcin daeuj lo, mbungq- mbaj gyaeundei daeuj lo. Mbungqmbaj daenj vaqbuh lengj- lili, diuq gij foux ndeiyawj raixcaix. Roeggumj angq lai lo, de couh haengj caeuq mbungqmbaj guhcaemz guh’angq.

Seizhah daeuj lo, daeng- ngoenz ndatyanyan. Mbouj rox daj gizlawz senj daeuj gyoengq roeg- hanq ndeu. Youq gwnz raemxdah, roeghanq iq baenz ngoenz bek fwed fafa, mbouj rox mbwq mbouj rox baeg. Roeggumj cam:“Sou ndaej hoengq mbouj yietnaiq, baenzngoenz bekfwed, mbouj baeg ma?” Roeghanq iq naeuz:“Gou cingq lienh fwed yaek mbin sang ne. Dou aeu mbin bae giz gyae gvaq doeng ne.” Roeggumj naemj: “Gou couh mbouj bae baenz gyae, beg sinhoj.”

Seizcou daeuj lo, mbwn lamz fwj hau, baenz gyoengq roeggeuq guhdoih mbin daeuj dot haeuxgok caeuq ceh rum gwn, yaephe, youh baenz gyoengq mbin deuz lo. Yienghneix baebae dauqdauq. Roeggumj yawj mbouj gvenq lo, cam:“Sou vihmaz cungj mbouj dingz roengzdaeuj guhcaemz ne, baebae dauqdauq geijlai maz- fanz.”Roeggeuq naeuz:“Dou cingq bwh haeuxliengz gvaq doeng ne.”Roeggumj naemj: “Gizgiz miz gij gwn, bwh gijmaz?”

Haemq nanz mbouj raennaj lo, roeggumj siengj bae ra nounaz, lwnh de swhgeij raen gvaq gijmaz dingq gvaq gijmaz, hix hawj de angqmaengx.

Nounaz gaenq guh ndaej rongz moq ndei, demh le caengz haz umq nanwtnwt ndeu, lij comz le baenz doi baenz doi haeux- liengz. De simgip dwk doiq roeggumj naeuz:“Mwngz bae gizlawz guhcaemz lo, wnggai guh rongz youq vuen di lo, caemhcaiq lij aeu miz aen dieg ndeu yo doxgaiq, seizdoeng yaek daeuj lo.”Roeggumj naeuz:“Mwngz duz huk neix, vunz guh ranz mwngz hix guh rongz. Ganj haeux yied maj yied sang lo, haeuxgok yied daeuj yied fag lo, ndaw doengh mbouj couz gwn mbouj couz youq, yungh ndaej daengz ma?”

Roeggumj laebdaeb dauq- cawq youzlangh, gizlawz ndei guhcaemz couh bae gizlawz.

Gig vaiq, vunz gvej haeux sou hwnjdaeuj lo, ndaw doengh hoengqhathat lo.

Rumz sae yied daeuj yied gengx lo, roeghanq bek fwed mbin deuz lo.

Rumz baek daeuj lo, doek nae lo, gizgiz mbwn nit deih gengx, doenghduz cungj ndoj haeuj rongz bae mbouj okdaeuj lo.

Ndaw naz caiq hix ra mbouj ndaej gij gwn lo, roeggumj youh nit youh iek. Gyawj haemh, de gipgip muengzmuengz lamx di haz ndeu, luenh dap aen rongz ndeu, ndoj haeuj ndaw bae, de nit dwk saenzdedded, de siengj ciengq go gaij haemzhoj:“Saenzdedded, rumznit gengx dai gou, ngoenzcog couh guh rongz nanet. Saenz- dedded, rumznit gengx dai gou, ngoenzcog ragwn dungx rimbyed.” Singgo yied daeuj yied daemq yied daeuj yied cax.

Byonghhwnz, roeggumj dai lo.(Ganh Sozvwnz/甘说文)