Cawjranz de heuh guh Vangz Genbauj, song gvanbaz ciengx ndaej 7 boux lwgnyez, lwgdaeuz ngamq cuhcungh bizyez dauqma ranz guh hong, lwgcod ngamq seng ndaej ndwen lai. Ranz neix dwg ranz vunz lai, hoeng vunzguhhong noix gwndaenj haemzhoj ndeu. Cawjranz song gvanbaz caeuq vunzmbanj wnq cungj heuh de guh “Laujveiz”. De doiq vunz gig hozswnh, mbouj baij saekdi bouj, daengxcungq vunz haemq haengj caeuq de doxging.

Cawjranz aenvih gwndaenj haemzhoj, ceng mbouj geijlai donq- donq gwn souhdaeq, gwn byaekmaenz, seizdoeng gwn byaekgat, seizcin gwn byaekrwzvaiz, cijmiz gvaqciet cijndaej gwn donq haeuxnaz caeuq didi noh.

Gyoengq boux vunzdoih caeuq Veiz Gozcingh caemh youq aen swnghcanjdui haenx ndawde, miz boux ndeu dwg boux ganbu Yenveij Vujmingz, cienmonz bang Veiz Gozcingh guh fanhoiz caeuq guh diucaz. Vahcuengh Vujmingz caeuq Vahcuengh Doenglanz Veiz Gozcingh gangj haenx mbouj doxdoengz geijlai, mbouj fanhoiz cix dingq mbouj rox geijlai. Geij boux dungzci henzndang de lau soujcangj dwgrengz lai, cix caegcaeg bae cawx ndaej di bingj cuengq youq gyaeujmbonq Veiz Gozcingh, Veiz Gozcingh fatyienh le, haemq mbouj angq naeuz: “Seizneix vunzlai gwndaenj lij haemzhoj lai, raeuz aeu caeuq vunzlai caemh- haemz caemhhoj, cijmiz caemhhaemz caemhhoj le cij ndaej caemh minghyinh, cij ndaej daengxcungq doxgiet, doengzsim doengzdaek, fazcanj swnghcanj, gaijbienq mienh- mauq. Seizneix di haemz neix suenq gijmaz, gvaqlaeng sou gaej luenh guh dem.” Gangj sat le, de dawz bingj okdaeuj caeuq daengx ranz vunz cawjranz de caez gwn.

Doeklaeng, cawjranz ndaej rox boux “Lauxveiz” doz youq ranz de neix, yienzlaiz dwg boux suhgi daeuzit Swcigih Dangjveij、boux cujsiz swcigih, de gamjdaengz gig miznaj, hoeng, caemh vih ranz de dakdaih mbouj ndei gamjdaengz gig najnyaen. De naeuz: “Lauxveiz, sou geij boux youq ranz gou, dwgrengz lo, caen doiq mbouj hwnj.”

(caengz sat)