Bi’gvaq, gou doenggvaq gingbin gaujsi, ndaej diuh daengz yienhsingz guhhong, youq yienhsingz cawx ranz youq, cij suenq baenz boux vunz lajmbanj youq ndawsingz ndeu lo.

Youq ndawsingz gvaq saedceij, gou roxnyinh miz di sieddaej, sien dwg deng fag cimdinj cijveih, ngoenznaengz guh gijmaz cungj aeu dinghseiz daeuj guh, hwnjban、roengzban……yienghyiengh aeu ciuqseiz, mbangj baez cungj diemcaw mbouj gvaqdaeuj, ngaenzcienz hix bienq ndaej gaenj hwnjdaeuj, gou lumj gij vunz ndawsingz ityiengh, baenzngoenz vihliux gvaq saedceij nyaengqnyatnyat. Yienghneix hawj gou gig siengjniemh gaxgonq youq lajmbanj gvaq gij saedceij soengsetset haenx. Seizhaenx, mbouj miz haeux gwn, couh bae ranzcoj caeuq daxmeh aeu, couh suenq gwnz ndang mbouj miz saek faen ngaenz, gvaq saek cib ngoenz roxnaeuz buenq ndwen cungj mbouj miz saeh, ciuqyiengh ndaej gwn imq ninz ndaek, seiznit haetromh, danghnaeuz miz hoengq, couh youq laj gokciengz byoq ndit, riengz ranznden gangjgoj, cwxcaih raixcaix.

Youq ndawsingz, vihliux guh- hong, vihliux gvaq ndwenngoenz, daengxngoenz ndonj youq gyang loh vunz ci baebae dauqdauq nyaengq- nyatnyat haenx, yienghneix gig noix ndaej hoengq baema ranzcoj lo, hoeng, hawj gou cuengqsim mbouj ndaej dwg daxmeh gou, daxmeh nienzgeij geq lo, daengxngoenz lij dwg fwn doek byajraez cungj bae guh hong reihnaz. Daxmeh ndaejhoengq hix daeuj yienhsingz riengz dou youq saek ngoenz, gou gaenq haujlai baez heuh de daeuj yienhsingz riengz gou youq, hoeng daxmeh cungj mbouj daeuj, naeuz youq yienhsingz mbouj gvenq, ngoenznaengz haeuj ranz couh gven dou hwnjdaeuj, mbouj miz saek boux baengzyoux beixnuengx gangjgoj, ngoenz mbwq lai; caiq miz dwg gou lij miz daeg nuengx ndeu youq lajmbanj lij caengz baenzgya, daxmeh yaek youq ranz goq de.

Daxmeh mbouj youq henz ndang, couh lai miz faenh niemh ndeu, gou naeuz cawx aen soujgih ndeu hawj daxmeh, youq mwh gou ndaejhoengq seiz daj denva caeuq de gangjgoj, hoeng, daxmeh mbouj doeg saw gvaq, cih saw hung goz mehvaiz cungj mbouj rox yawj. Daxmeh naeuz de mbouj rox yungh soujgih, couh mbouj cawx lo.

Mboengqgonq, daiq gij hwnz- ngoenz siengjniemh daxmeh haenx, youq seiz ndaejhoengq, gou ma mbat ranzcoj ndeu. Haemhhaenx, daxmeh yungh rekdiet gaeuq daeuj cawj haeux, rek haeux haenx homfwdfwd, gij byaekheu daxmeh cawj haenx hix homfwdfwd, dou gwn ndaej gig miz feihdauh, hawj gou siengj daengz seiz lij iq gij ndwenngoenz soengswtswt haenx. Gwn caeuz seiz, dahlwg iq gou riu naeuz: “Gij byaek gij haeux ranz daxbuz beij byaek haeux ndawsingz ndei gwn lai bw!” Dwg ha, youq yienhsingz, ngoenznaengz bae haw cawx ma gij byaekheu haenx yienz naeuz youh oiq youh ndeiyawj, hoeng couh mbouj beij byaek mbanjranz ndei gwn, cawx cauhsi ndaej gij haeuxhau ndeiyawj haenx ma ranz cawj le ndongjndwtndwt, baenzlawz hix mbouj beij gij haeux daxmeh gag ndaem ndei gwn.

Aenvih danhvei hong lai, youq ranz song ngoenz gou couh deng dauqma ndawsingz lo. Seiz yaek okdou, daxmeh baenzlawz cungj aeu hawj gou dawz daeh haeuxhau hung de gag ndaem haenx ma yienhsingz gwn, hoeng gou yiemz naek lai hoj dawz, cij aeu geij gaen ma ranz yienhsingz.

Miz ngoenz ndeu, yienznaeuz daengz seizcin lo, dienheiq lij liengzseuseu, gwnz mbwn doek fwnmoenq foenfoen, gou roengzban ma ranz, ngamq daengz bakdou siujgih, youq giz gyae’gyang haenx couh yawjraen daxmeh ndwn youq bakdou aen danhyenz gou caj gou, rumzliengz cififi, de ndwn youq ndaw rumz saenz- dedded. Baenzlawz la, gou bae ranzcoj dauqma lij caengz ndaej ndwen ne, daxmeh couh daeuj yawj gou, ciengzbaez heuh de daeuj de lij mbouj haengj daeuj ne! Dwg mbouj dwg ndaw ranz mizmaz saeh youqgaenj? Ndawsim gou mbouj onj hwnjdaeuj.

Byaij daengz dangnaj daxmeh, gou yawjraen byoem de beij gaxgonq hau lai lo, gwnz naj hix nyaeuq lai lo. Daxmeh naeuz:“Gou dawz haeux daeuj hawj sou, gaugwnz mwngz baema ranz, cij dawz geij gaen dauqma yienhsingz, ngoenzneix gou ndaejhoengq, couh soengq daeh haeux haenx daeuj hawj sou, haeux ranz raeuz mbouj dwk ywnungzyoz caeuq vafeiz, beij gij haeux ndaw haw gai haenx ndei gwn lai lo.” Daxmeh lij dawz gaem byaek heu oiqswtswt ndeu daeuj dem. Yawj daengz daeh haeux miz saek hajcib gaen naek neix, sim gou nanzgvaq dangqmaz, raemxda nyaenx mbouj ndaej lae roengzdaeuj.

Gou bonjlaiz siengj hawj daxmeh lai youq geij ngoenz, hoeng daxmeh naeuz yaek muengz bae ranz ndaem haeuxyangz, yienghneix ngoenz daihngeih de couh dauq baema ranzcoj lo. Gou soengq daxmeh ok bakdou siujgih, gwnz mbwn lij doek fwnmoenq, doek youq gwnz byoemhau daxmeh. Yawj dwk aen ndangdaej byomnyieg daxmeh youq ndaw vunzlai yied byaij yied gyae, aen ndaeng gou soemjsausau, raemxda youh nyaenx mbouj ndaej lae roengzdaeuj.

Haeux daxmeh dwg daxmeh doiq bouxlwg youq baihrog faenh cingz naekna ndeu, gou lumj duz roegien nei mbin youq diegwnq, hix mbouj rox seizlawz cij ndaej bauqdap gij aencingz naekna daxmeh!

Haemh haenx, gou dawz daih haeux haenx daeuj guh swiz demh ninz, ninz ndaek fangzhwnz diemzsisi, youq ndaw fangzhwnzloq, gou mbin daengz mbanjranz, yawjraen rumh- ngaeuz daxmeh youq ndaw reihnaz baedauq guhhong……