Dwk lwggwz roengz gu bae naengj cug le fwngz sik de baenz diuz saeq, doeklaeng rwed naez gyaeujsuenq、gyu、veicingh caeuq ciengq lwgraz daengj, feihdauh engq ndei gwn.

Ciuq swhliu gaisau naeuz, ndaw naeng aeuj lwggwz hamz miz veizswnghsu E caeuq veizswnghsu p gig lai, cungj byaek wnq nanz hamz miz cungj huq neix, veizswnghsu P ndaej hawj sailwed bienq unq, gyangqdaemq danjgucunz, fuengz sailwed saeq ok lwed, doiq boux baenz hezyaz sang、boux baenz doenghmeg giet ndongj、boux baenz lwed vaih dai cungj miz ik. Linghvaih, gij B cuz veizswnghsu ndaw lwggwz doiq mehmbwk dawzsaeg in、boux baenz menhsingq dungxin caeuq boux baenz mak in foegraemx hix miz itdingh ceihyw cozyung. Ndigah, gwn lwggwz seiz ceiq ndei gaej dat naeng bae, aenvih naeng de hamz miz daihliengh yingzyangj cwngzfwn caeuq vahozvuz doiq gengangh miz ik haenx. Conhgyah lij nyinhnaeuz, banhfap gwn lwggwz yienznaeuz lai, hoeng guh baenz naez gwn yaugoj ceiq ndei, neix dwg aenvih lwggwz haengj sup youz. Lwggwz dwk youz caq gwn mboujdanh yingzyangj cwngzfwn sied bae lai, caemhcaiq gwn le nanz siuvaq supsou. Daegbied dwg boux amqbak mbouj ndei, gwn gvaq lwggwz youz caq le rox gamjdaengz dungx ciengq. Naez lwggwz mboujdanh ndaej diuzleix aendungx, boujcung yingzyangj, caemhcaiq naengz siu ndat gej doeg dem, doiq vanjgaij haexgaz hix miz gig ndei ceihyw cozyung. Lwggwz lij ndaej fuengzceih binghlwedvaih caeuq coi baksieng hobndei.