Aen cienanq siujcuj ginggvaq cazcingq, Liengzsinh Gunghse miz boux Luz Youjgvangh dahraix, hoeng de naeuz de baenzciuh cungj mbouj gai gvaq fwnz, engq mbouj gai fwnz bae Liengzdungz baenzneix gyae. Doiq gij baengzcingq 11 bit damngaenz cienanq siujcuj caz ndaej haenx, Veiz Gozcingh mbouj cuengqsim, yungh sam ngoenz seizgan caeuq gij vunzhong cienanq baez bit baez bit saemjngonz, heuh cienanq siujcuj baez bit baez bit gangjmingz. De nyinhnaeuz miz 8 bit mbouj miz ngeizdiemj, ngaenz deng dam haenx ndaej 2100 maenz, liux le gyau hawj gunghcozdui caeuq Binzya cungh- nungz Hezvei bae ra bonjfaenh de dangqnaj cazdoiq, caenhhengz baebuenq, caz mbouj ok baengzcingq cix gaej dwen saekdi. Vangz Sihgaih youq dangqnaj vunzcingq huqcingq siengzsaed haenx, cienzbouh nyinh- coih, caemhcaiq geij ngoenz ndawde doiqboiz le 700 lai maenz. Seizhaenx, miz mbangj vunzcungq daezok aeu buenqhingz Vangz Sihgaih. Veiz Gozcingh caeuq Ho Yiyenz boux gungh’anhdingh fudinghcangj seizde youq Daliengz guh boux bencangj haenx doxvuenh yigen, nyinhnaeuz vunzde gaenq lauxsaed gangj okdaeuj gvaq, caemhcaiq caenhrengz boiz ngaenz, ceiqndei dwg mbouj buenqhingz. Doeklaeng, ginggvaq Binzhez yaeng- lwnh, dingh dangqguh gij mauzdun ndaw lwgminz daeuj cawqleix, lij faenboiq de bae guh bouxguenjraemx. De bonjfaenh caeuq vunzranz gig souh gamjdoengh.

Daliengz Itdoih duicangj Liengz Yungjvangz, soqlaiz cungj gig hwnjheiq guh hong, aendoih neix bibi demcanj. Miz vunz gawjbauq de damngaenz 2400 maenz, gunghcozdui caiqsam haedcaz, saedsaeh cij nodyungh le 24 maenz. Veiz Gozcingh dingq gvaq gyoeblwnh le, gidij cazcam mizgven cingzciet, yiemzsuk dwk naeuz: “Raeuz mbouj ndaej cuengq gvaq saek boux vunz miz vwndiz haenx, hoeng caemh mbouj ndaej ienquengj saek boux vunz ndei, caz seuq le cix gietanq, dwg geijlai suenq geijlai.” Liengz Yungjvangz youq swnghcanjdui guh gvaq genjcaz le, daengxcungq ciuqyiengh yungjhu de bae laebdaeb guh duicangj.

(caengz sat)