Mbwk: Beix naek cingz dahraix,

Song baih gaej doxlumz;

Ndwen miz samcib ngoenz,

Ndaejhoengq cix gvaqdaeuj.

Daengx guek cungj doxdoengz,

Haj ngoenz bungz lijbai;

Beix naek cingz dahraix,

Song baih gaej doxlumz.

Dahgya miz baengzyoux,

Boux ma boux mbouj cunz;

Ndwen miz samcib ngoenz,

Ndaejhoengq cix gvaqdaeuj.

Sai:Beix mbouj hoengq bae cunz,

Nuengxlunz hix gaej gvaiq;

Gaiqnaz hai song raiq,

Hojnanz byaij hwnjroengz.

Max deng gyaeng ndaw lanz,

Aenfanz mbouj ndei lwenh;

Beix mbouj hoengq bae cunz,

Nuengxlunz hix gaej gvaiq.

Din ndeu dieb song ruz,

Lauheiq vunz baklai;

Gaiqnaz hai song raiq,

Hojnanz byaij hwnjroengz.

Mbwk:Ranz nuengx youq lajbya,

Beix gvaqma cix haeuj;

Siengj daeuj mwngz cix daeuj,

Nuengx bwh laeuj caj mwngz.

Doxbiek geij cib nienz,

Miz yienz dauq raennaj;

Ranz nuengx youq lajbya,

Beix gvaqma cix haeuj.

Doengzhag daeuj doxcunz,

Mbouj lau vunz gangjraeuh;

Siengj daeuj mwngz cix daeuj,

Nuengx bwh laeuj caj mwngz.

Sai: Daengh nuengx dauq baema,

Miz gya naihsim ganq;

Gaej doeng youz sae langh,

Deng vunz gangj mbouj ndei.

Ndaemcin nyaengq cix gangj,

Beix bae bang raeq naz;

Daengh nuengx dauq baema,

Miz gya naihsim ganq.

Ciengzseiz geiq ndawsim,

Nyinhcaen gaej hwnjdang.

Gaej doeng youz sae langh,

Deng vunz gangj mbouj ndei.(8)