Guh hong ndaej ndwen le, Veiz Gozcingh ciuq gij gyoeblwnh daihgya caeuq gij cingzgvang de gag liujgaij ndaej haenx, youq baez hoih bencangj gwnzde naeuz:“Yawj gij cingzgvang seizneix raeuz aeu ndaej haenx, gij ganbu Liengzdungz daih dingzlai dwg vunzndei roxnaeuz gihbwnj dwg vunz- ndei, miz dingznoix famh gvaq loek, hoeng hix mbouj ndaej gangj gyoengqde dwg vunzvaih, raeuz aeu doenggvaq bihbingz son’gyauq, bae gouq gyoengqde. Gij vunz fanzdwg ginghci miz vwndiz haenx, aeu cagaenj caz de, loengh seuq vwndiz, caenhvaiq gietanq. Hai hoih baebuenq gij ganbu famhloek haenx, itdingh aeu baij saehsaed, gangj dauhleix, mboujcinj dub vunz. Gyawz dub vunz nei, couh aeu fad gunghcozdui.” De iugouz, daj haeujdiemj suenq hwnj, aeu ceng ndaej youq song sam ndwen ndawde “gaijfang” ganbu okdaeuj, cienj haeuj gak hangh hongsaeh bae guh hong.

Miz boux ganbu heuh guh Vangz Sihgaih, doenghbaez de cawjguenj Yiuzcienngvax Dadungz, youh guenj ngaenz youh guenj ciengq, vunzcungq byoengq coih damngaenz de. Gunghcozdui baengh vunzcungq, ginggvaq cobouh cazsoq, miz 21 bit soq mbouj cingcuj, ngaenz lai baenz 5000 lai maenz. Veiz Gozcingh raen ngaenz baenzlai, dwg caen dwg gyaj, ndawsim mbouj miz daej, cix daj ndaw gunghcozdui cou seiq boux ganbu miz gingniemh haenx okdaeuj, gyoebbaenz aencuj- saeq cienanq baez bit baez bit bae fukcaz. Aencujsaeq cienanq neix ginggvaq sijsaeq diucaz, caz ok Vangz Sihgaih cawx fwnz cauh le feigyaj. Lumjnaeuz mbaw fei lingx- aeu ngaenz fwnzcoengz 80 maenz he, gwnzde gaep miz aen yaenq Vangz Ciyingh Mbanjhozfuh Gih Cwngzsiengh he, aencujsaeq bae ra deng Vangz Ciyingh, de mbouj nyinh bonjfaenh lingx gvaq gij ngaenz haenx, aenyaenq caeuq aenyaenq gwnz fei caemh mbouj doxdoengz. Youh lumjnaeuz miz mbaw fei raiz miz Ningzvuj Gih Liengzsinh Gunghse Luz Youjgvangh gai fwnz 5420 gaen, geiq ngaenz 162.6 maenz he. Hoeng yiuzcienngvax coengzlaiz mbouj bae gizde gai fwnz gvaq.

(caengz sat)