Mbwk:Nuengx baenz aen ronghndwen,

Cuenq gyangbiengz vangvang;

Miuzcin va yaek sanq,

Yienghlawz suenq cix ndei.

Laeb miuh mbouj bouxdaeuz,

Rox bae gyawz coemh yieng;

Nuengx baenz aen ronghndwen,

Cuenq gyangbiengz vangvang.

Dauq cam beix vunzlungz,

Ei mwngz yienghlawz gangj;

Miuzcin va yaek sanq,

Yienghlawz suenq cix ndei.

Sai:Caez coq bwnh roengz naz,

Daemzmiuz va hoengh hai;

Daengq nuengx gaej doeknaiq,

Va baih lij miz aen.

Lajdin caij roeggyumj,

Lij bae naemj gijmaz;

Caez coq bwnh roengz naz,

Daemzmiuz va hoengh hai.

Gaej ienq deih ienq mbwn,

Cin daengz vah youh hai;

Daengq nuengx gaej doeknaiq,

Va baih lij miz aen.

Mbwk:Ngoenzneix nuengx souh vei,

Mbouj meiz(miz) bouxlawz bang;

Langh beix miz sim ganq,

Saet nanz daeuj saek haemh.

Nuengx bwh laeuj bwh caz,

Ndaej raennaj cix ndei;

Ngoenzneix nuengx souh vei,

Mbouj meiz(miz) bouxlawz bang;

Rumzdoeng gauj begloh,

Va oq lij geij nanz;

Langh beix miz sim ganq,

Saet nanz daeuj saek haemh.

Sai: Nuengx sinhoj gou rox,

Simgyoh hix nanz bang;

Gag boux youq gag ranz,

Yienghlawz bang ndaej nuengx.

Hoz goj siengj bae cunz,

Lauheiq vunz diemj coh;

Nuengx sinhoj gou rox,

Simgyoh hix nanz bang.

Beix siengj langhfwed mbin,

Lajdin youh miz vangj;

Gag boux youq gag ranz,

Yienghlawz bang ndaej nuengx.

(7)