Seizhah, vunzraeuz ceiq haengj yungh funghyouzcingh lo, de dwg gij huq daez saenz singj uk、siu hwngq、giep fung dingz in、gyaep nyungz siu haenz he. Hoeng cigndaej vixok dwg, gij cujyau cwngzfwn funghyouzcingh ndawde cungj ndeu dwg canghnauj, cungj huq neix miz di doeg he.

Ciuq yozlij yenzgiu faensik nyinhnaeuz, gij canghnauj ndaw funghyouzcingh haeuj daengz ndang vunz bae le, buzdauzdangz linzsonh dozginghmeiz gig vaiq couh caeuq canghnauj giethab baenz doxgaiq fouz doeg, doeklaeng riengz nyouh baiz okdaeuj. Ndigah mbouj rox fatseng fanjying mbouj ndei.

Hoeng, aenvih gwnz sengleix miz bienqvaq, gij buzdauzdangz linzsonh dozginghmeiz ndaw ndang mehdaiqndang hamzliengh doekdaemq. Daiqndang sam ndwen dauqndaw danghnaeuz yungh funghyouzcingh daiq lai, canghnauj couh rox doenggvaq daibuenz haeuj daengz lwgndaw- dungx bae, youqgaenj seiz rox hawj lwgndaw- dungx daigaemz, yinxhwnj lonlwg.

Buzdauzdangz linzsonh dozginghmeiz ndaw ndang lwgnding hix noix, mehsenglwg danghnaeuz yungh funghyouzcingh daiq lai, canghnauj couh rox doenggvaq naengnoh caeuq nemmuek camhaeuj ndaw lwed lwgnding bae, yinxhwnj lwgnding baenz vuengzbiu. Ndigah, mehdaiqndang seizhah wng geih yungh funghyouzcingh.