Daj haiguh“Lajmbanj Cengh- seuq, Vujmingz Gyaeundei”aen hozdung neix daeuj, ranzmbanj gou fatseng bienqvaq gig hung.

“Va……va……va”， yi, gij sing ndeidingq neix daj gizlawz daeuj ne? O, yienzlaiz dwg dah’iq ranzmbanj cingq lae ne. Raemxdah sawdikdik haenx youq laj ndit ronghsag fubfeb. Neix dwg gij sing riu dah’iq ha! Gij sing riu neix hawj vunz yawj le nyaenx mbouj ndaej iet fwngz roengz raemx bae, yaepyet, raq liengz ndeu daj faj fwngz cienz daengz ndaw sim, hawj mwngz simsoeng dangqmaz. Gyoengq vunzmbanj cungj gyaez daeuj gizneix saeg buh; lwgnyez hix gyaez daeuj henzdah guhcaemz, sing angqhemq, sing riu, sing raemx lae, yiengj baenz benq ndeu. Cungj diegyouq neix ndei gvaq diegsien.

Naj doiq dah’iq, gou ngeix hwnj gij cingzgingj bi lai gaxgonq. Seiz- haenx, vunzmbanj dang dah’iq baenz lahgizciz, heiqhaeu daemj mbwn, raemxdah hix nyumx baenz saek ndaem, hawj vunz siengj rueg, lienz boux lohgvaq cungj goemq ndaeng dwk gig vaiq byaij bae. Seizneix dah’iq bienq ndei lo, caeklaiq miz hangh gunghcwngz doiq nungzminz miz ik neix.

Menhmenh byaij youq gwnz lohmbanj cenghseuq, simcingz gou bienq ndaej engqgya vuenheij. Song henz loh maj rim baenz caz baenz caz nywjheu. Sijsaeq yawj, mwngz couh yawjraen dujduj va’iq launyaenq dwk ndoj youq ndawde. Danghnaeuz mwngz ndwn youq gwnz lohmbanj cenghseuq neix, couh lienz doek geu byoem ndeu cungj roxnyinh dwg famhcoih. Dwg ha, caeklaiq miz hangh gunghcwngz doiq nungzminz miz ik neix. Nyapnyaj mbouj raen lo, haexvaiz mbouj raen lo, nywjheu mbouj miz doenghduz bae nyoeg- nyamx lo, doemboenq deng sauq cengh lo, gij yiengh uqlah haenx caiq mbouj raen lo.

Gou saenq, cijaeu “Lajmbanj Cenghseuq, Vujmingz Gyaeundei” aen hozdung neix laebdaeb guh roengzbae, ranzmbanj raeuz daengzcog engq gyaeundei!

（指导老师：潘文清）