Veiz Gozcingh lai baez bae dieglaux diucaz, baez yienh baez yienh caeuq gij goengdaeuz dangdieg caez ngeixyaeng fuengfap hwngvuengh ginghci. De cungjdwg menjli gij ganbu caeuq vunzlai dangdieg naeuz, aeu fazyangz gij cienzdoengj najrongh gwzming dieglaux, haenq- rengz bae guh, daj saehsaed okfat, mbefat swnghcanj. De naeuz: “Guh hong gensez, guekgya ciengzciengz ciuqgoq dieglaux, hoeng gaej gijmaz cungj baengh guekgya, cijmiz gag baengh bonjfaenh haenq guh gonq, cijndaej engqndei fazveih cozyung.”

Bi 1966 ndwen 4, de caeuq Cinz Yinggih、Lij Yinhdanh、Liuz Cunggvei (Gvangjsih Ginhgih fuswhlingyenz) bae daengz Doeng- lanz、Fungsanh diemjcaz guh hong seiz, haenq giengzdiuh naeuz, aeu hawj hong yienh’ok cwngci roengzmaenh daengz cingeng guh hong baihneix bae, roengzmaenh daengz caenhvaiq gaijbienq gij doeklaeng diegbya baihneix bae, hagsib sawokmingz Mauz cujsiz, aeu haeujsim haekfug hingzsicujyi. Youq diegbya, vunzguh- hong noix, hong naek, hong youh lai, aeu anbaiz ndei vunzguhhong. Gij gensez goekdaej ciengzgeiz caeuq dangbi souhaeuj cungj aeu ca ndei, hoeng ca ndei dangbi souhaeuj wnggai guhcawj, itdingh yaek aeu youq ceng ndaej dangbi demcanj aen goekdaej neix gwnzde hwnjheiq guh hong gensez goekdaej. Guh suijli aeu haeujsim dwk ciengqsiumied, guh gij dangbi cix raenyauq haenx gonq, doengzseiz aeu baujcingq cizlieng, genhciz biucinj sang. Heuh ndoibya hawj nazreih doengzseiz, yaek aeu miz giva miz dazyinx dwk haifat nazmbaek bingzraemx, mienxndaej namhraemx laesaet. Caemh yaek aeu heuh diuzdah hawj nazreih, gaij cangzdah baenz gaeb di, gij ngutngut ngeungeu haenx aeu gaij soh bae, mienxndaej nazreih deng cung vaih, yienghneix lij ndaej demgvangq dieggeng. Hwnj ranz gaej saenq maezsaenq fungsuij, gaej ciemq yungh nazreih, hoeng aeu haeujsim fueng’yiengq, hwnj baek coh namz, doeng raeuj hah liengz. Aeu guh ndei vunz caeuq doihduz faen youq, cugbouh gaij gij ranzhaz baenz gij ranz ciengzboengz nengzngvax roxnaeuz gij ranz ciengzcien nengzngvax bae. Gij fungsug sibgvenq doenghbaez de, gij ndei cix swnj roengzbae, gij mbouj ndei cix aeu gaij.

Gij hong banggungz dieglaux、dieg minzcuz vunznoix、diegbien、diegbya caeuq dieghoj haenx, itcig cungj dwg gienh saeh laux liggaiq Swcigih Dangjveij、Cwngfuj ciengzgeiz ca maenh mbouj cuengq he, seizneix vanzlij dwg hangh hongnaek ndeu.

(caengz sat)