Mbwk: Doeg sam bi cunghyoz,

Gag gyoh siengj mbouj daengz;

Gungh daiz bingzbaiz naengh,

Lumjbaenz song dah nuengx.

Bae Liujcouh guh’angq,

Gwn byaek van baenz noh;

Doeg sam bi cunghyoz,

Gag gyoh siengj mbouj daengz.

Ngeix lai haemh doekloq,

Sim gyoh gaenq doeklaeng;

Gungh daiz bingzbaiz naengh,

Lumjbaenz song dah nuengx.

Sai: Ngeix daengz nuengx gamjcingz,

Beix ciuhvunz goj geiq;

Bae daengz seiq daihngeih,

Hoenz leix bae doxcunz.

Sam bi caez guhdoih,

Seng baenz doiq roeg mbin;

Ngeix daengz nuengx gamjcingz,

Beix ciuhvunz goj geiq.

Dwen gaxgonq vah lai,

Nyienh dai mbouj duenq heiq;

Bae daengz seiq daihngeih,

Hoenz leix bae doxcunz.

Mbwk:Doeg saw caez gungh daiz,

Gwn ngaiz caez gungh daengq;

Gonq rox miz yienzfaenh,

Cix saek raemx caj ruz.

Beix soengq geu buhlangj,

Nuengx simvan soengq haiz;

Doeg saw caez gungh daiz,

Gwn ngaiz caez gungh daengq.

Lwg’it le lwgraz,

Nuengx cix hah aenfaenh;

Gonq rox miz yienzfaenh,

Cix saek raemx caj ruz.

Sai: Gaxgonq geij yungh ngeix,

Vaih simsaeh song mbiengj;

Mbouj fukfaenh le nuengx,

Lij bae ienq duzmaz.

Gwn raemx loek doiq meiq,

Nyah betceih mbouj ndei;

Gaxgonq geij yungh ngeix,

Vaih simsaeh song mbiengj.

Raeuz mbouj dwg bouxyah,

Sien baenaj raen gonq;

Mbouj fukfaenh le nuengx,

Lij bae ienq duzmaz.(4)