Cunghsinh Yau Dox-

dax Gangj Gojgaeq Vahcuengh

Vihliux senj boux hagseng youhsiu bae camgya daihsam gaiq daengx gih siujhagseng yungh byauhcunj Vahcuengh gangj gojgaeq doxdax bineix 10 nyied Swcigih Gyauyuz Dingh gawjbanh neix. Ndwen gonq, Sanglinz Yen Dangzhungz Cunghsinh Yau guh byauhcunj Vahcuengh gangj gojgaeq doxdax, gungh miz 7 aen siujyoz 21 boux hagseng daeuj camgya doxdax. Doxdax laeb it、ngeih、 sam daengj ciengj gak 7 boux.

Youq doxdax seiz, gak boux hagseng cungj yungh byauhcunj Vahcuengh raeuzradrad gangj gij goj ndei saeh ndei ranzmbanj swhgeij, ndaej daengz saeseng dopfwngz haenhndei.

2013 nienz, Dangzhungz Cunghsinh Yau ndaej Swcigih Gyauyuz Dingh nyinhdingh guh Cuengh Gun song saw vah sonhag sifan gihdi daeuj, hagdangz mboujduenh caezcienz guenjleix, gyagiengz song saw vah sonhag guenjleix, lauxsaed guh ndei hong song saw vah sonhag, ceng’aeu dawz hong Cuengh Gun song saw vah guh ndaej engqgya ndei. (Lanz Cwng Fanz Gvanghminj/蓝 政 樊光敏)