5 nyied co daengz 7 nyied daej, Gvangjsih Cwngzsi Cizyez Yozyen youq ndaw yozyau gawjbanh Sawcuengh nem vwnzva Bouxcuengh beizyinbanh, aen ban neix youz Swcigih Minzyijveij cawjbanh, Cungzcoj Si Minzyijveij、Gvangjsih Cwngzsi Cizyez Yozyen lienzhab ciuqbanh. Baez beizyinbanh neix gungh 3 ndwen; moix sihgiz singhgizhaj banhaemh、singhgizroek daengx ngoenz hwnjdangz; cujyau son gij gihcuj cihsiz Sawcuengh、gij fuengfap fanhoiz nem sij Sawcuengh、seizneix baenzlawz swnjcienz nem fazcanj Fwencuengh、vwnzva Boux- cuengh daengj cihsiz. Doenghboux camgya beizyin de dwg hagseng ndaw Gvangjsih Cwngzsi Cizyez Yozyen; gungh miz 40 boux gak minzcuz hagseng camgya. Baez beizyinbanh neix cingj Gvangjsih Sam Nyied Sam Cazcise cungjbenhciz Cin Siengzcouh daengj doenghboux lauxhangz daeuj hwnjdangz.

Doenggvaq gawjbanh beizyin- banh, gyoengq hagseng neix lai roxyiuj gij minzcuz cwngcwz、minzcuz yijvwnz cwngcwz dangj nem guekgya raeuz, lai rox gij cingsaenz gvendaengz Cunghyangh fazcanj saujsu minzcuz vwnzva saehnieb, bangcoengh hagseng Bouxcuengh roxyiuj gij vah daegbied minzcuz、gij saw minzcuz hag ndaej ngaih nem gij vwnzva minzcuz gyaenanz, hawj hagseng lai miz saenqsim lai ndaenggon. Gujli gyoengqde daengzcog lai okrengz nem gaenxguh hong swnjcienz vwnzmingz、hezdiuz minzcuz gvenhaeh、henhoh minzcuz doxgiet nem sevei onjdingh, coicaenh dieg Bouxcuengh ginghci sevei ndaej engq vaiq fazcanj.

(Dwng Haijcouh/邓海周)