Lizhai Bingzgoj le, gyoengqde itloh gaujcaz le Denzdungh、Denz- yangz song aen yienh luegdah Dahyougyangh neix. Gizneix dwg aen diegbingz saeq dandog Baksaek Digih, caemh dwg aen dieg ok haeux Baksaek Digih. Hoeng, aen Dieggumz Dahyougyangh neix doek fwn noix, mbwn rengx mbwn ndat lai. Haujlai bi daeuj, aenvih mbouj miz suijli sezsih, haujlai nazreih mbouj ndaej saekdi souhaeuj. Youq sevei gaeuq, gizneix miz hot fwen eu yienghneix: “Guh naz cib baez ndaej saek baez, namhhenj gwn caez dangq guh donq; gwnz haw gai lwg raemxda roenx, fouznaih cij vih vuenh haeuxgwn.” Bi 1957 seizdoeng, youq swcigih gvansim lajde, Baksaek Digih youq gizneix hwnj le aen Suijgu Dahbakdoengj, geij fanh minzgoeng dingj nit ngoenz lienz hwnz haenqrengz guh hong, bi 1958 hwnj baenz, ndaej rwed raemx hawj haj roek fanh moux dieggeng, 7 aen gunghse souh’ik, doiq gaijbienq gij dieg neix swnghcanj nungzyez miz gij cozyung gig youqgaenj. Veiz Gozcingh miz aen naemjfap, buenxdoengz hongsaeh dienhraemx Guengjsae mbefat, dajsuenq youq gizneix guh camhguenqdienh, cou gij raemx Dahyougyangh hwnjdaeuj, rwed raemx hawj dieggeng, gaijgez gij vwndiz suijli gizneix. Doenghbaez, vunzlai gizneix yungh aengonh daeuj gonh raemx Dahyougyangh, dwgrengz raix- caix, yauqgoj mbouj hung. Youq nienzdaih doxbang doxcoengh, Mbanjsangdan vunzlai gonh raemx Dahyougyangh daeuj rwed naz, gyonj gonh 14 gaep raemx, daengx mbanj 56 boux vunzguhhong hwnz ngoenz mbouj dingz gonh baenz buenq ndwen, 300 moux haeuxgyang cij ciengjgouq ndaej 5 moux.

Gij goengdaeuz dangjveij caeuq cwngjfuj ndaw gih haenx cungj doengzeiq gij naemjfap Veiz Gozcingh. Daihgya nyinhnaeuz, Dieggumz Dah- yougyangh haeux wnggai ok ndaej lai, cijaeu caenh’itbouh guh ndei suijli, vanzcienz miz hojnaengz ok ndaej engqlai haeuxgaicawx, hawj Baksaek Digih ndaej gag baengh swhgeij gaeuq haeux gwn. Yienghneix, gizyawz 10 lai aen yienh diegbya cix ndaej fazveih gij ndei bonjfaenh, cungdenj guh hong ndoengfaex、hong langh ciengx doihduz、doenghgogai caeuq huqdoj.

(caengz sat)