Mbwk:Doengzhag geiq saenq daengz,

Nuengx song fwngz bae ciep;

Hai doeg yieb youh yieb,

Raemxda diet(lae) lumj fwn.

Raen saenq dangq raen naj,

Siengj nanzgvaq cibfaen;

Doengzhag geiq saenq daengz,

Nuengx song fwngz bae ciep.

Doeg daengz beix sawfaenz,

Rox mwngz goj lij nyieb(niemh).

Hai doeg yieb youh yieb,

Raemxda diet(lae) lumj fwn.

Sai: Ciep ndaej nuengx hoiz faenz,

Hai yawj dungx liengzyauj;

Doeg bae youh doeg dauq,

Raemxda dauj lumj fwn.

Raen saenq gangj cix rox,

Siengj ndeigyoh cibfaen;

Ciep ndaej nuengx hoiz faenz,

Hai yawj dungx liengzyauj.

Niemh doengzhag gamjcingz,

Ndawsim geiq daengz laux;

Doeg bae youh doeg dauq,

Raemxda dauj lumj fwn.

Mbwk:Dawz saenq beix ma hai,

Va gwnzdaiz caen haenh;

Coenz ndei coenz gw daengh,

Coenzcoenz doeng simdaeuj.

Un bancoz gaxgonq,

Nuengx nyienh goenh hoz dai;

Dawz saenq beix ma hai,

Va gwnzdaiz caen haenh.

Yienghyiengh cungj gvensim,

Yied doeg sim yied maengx;

Coenz ndei coenz gw daengh,

Coenzcoenz doeng simdaeuj.

Sai: Hai sawsaenq ma yoj,

Fangz ndaw moh caen gyangz;

Nuengx souh hoj souh hanz,

Beix simfanz nanzgvaq.

Dingq nuengx gangj hojcingz,

Haemh ninz caen doek loq;

Hai sawsaenq ma yoj,

Fangz ndaw moh caen gyangz.

Duenh youh duenh sinhoj,

Mbouj rox yienghlawz bang；

Nuengx souh hoj souh hazn,

Beix simfanz nanzgvaq.(caengz sat)