Gou dwg daeg lwgmbauq manzgyaengj ndeu, 9 bi lo, doeg sam nienzgaep. Aen ndangdaej gou cangqcwtcwt, youq ndaw ban dwg suenq boux maj ndaej sang lo. Aennaj gou luenzlulu, dienheiq baez hwngq hwnjdaeuj, song mbiengj gemj couh hoengzfotfot, lumj song aen mak bingzgoj .

Gou gyaez dwk lamzgiuz mbouj haengj hagsib. Lingz roengzdangz baez yiengj, gou couh lumj duzroeg daj ndaw roengq cuengq okdaeuj haenx bongh ok gyausiz, buet coh giuzcangz, lienh daiqgiuz、ndeklamz. Ye, ndek roengz aengiuz ndeu, caiq ndek aen dem ba! Gou sien daiqgiuz buetdaengz laj lamz, song fwngz gaem ndaet aengiuz, song ga maeuq roengzdaeuj di ndeu caiq diuq hwnjdaeuj, song fwngz yungh rengz dawz aengiuz ndek coh lamzgien,“ndei, youh ndek roengz aen ndeu!” Gou angq dwk hemq hwnjdaeuj.

Gou lienh dwk lamzgiuz yienghneix swnhfwngz, hoeng hagsib doiq gou daeuj gangj caen dwg nanz dai lo. Hwnjdangz seiz, gou caemh nyinhcaen dingqgangj, gaenx yaengxfwngz fazyenz, yijvwnz lauxsae hix ciengzciengz haenh gou ne. Hoeng moix baez sij cozyez, sij ndaej fwngz mazmwnh liux lo, lij mboujcaengz sij liux, caen nyapnyuk. Doenghgij cozyez hawj baema ranz guh haenx, gou mbouj sij gvaq geij baez. Daxboh daxmeh guhhong nyaengq raixcaix engqgya mboujmiz seizgan genjcaz gij cozyez gou lo. Haet daihngeih daeujdaengz hagdangz, cujcangj hemq gyau cozyez lo, gou couh dadaengx bak ajloengloeng. Gyoengq doengzhag doxcaemh cuj haenx cungj gvaiq gou.

“Mwngz vih gijmaz mbouj sij cozyez ha? Dwgcaengz mwngz lo!” Cujcangj fwngz vix haeuj laeng gou daeuj naeuz.

“Aen cuj raeuz caiq ngaiz gaeu bae 5 faen lo!” Vangz Mingz hujdengdeng dwk naeuz. “Caeuq mwngz doxcaemh cuj caen cuij lo!” Gij doengzhag ndaw cuj mwngz gangj coenz gou gangj gawq, gou dingq ndaej najhoengz rwzyag. Gou ngeix: Baezlaeng itdingh aeu guh cozyez liux bae, mbouj ndaej hawj aencuj raeuz gaeu faen lo. Hoeng, daengz sij cozyez seiz, gou youh gik hwnjdaeuj lo, cijgoq guh’angq.

Hai, neix couh dwg gou, ukgyaeuj cinglingz hoeng gig manzgyaengj.

(指导老师：韦春明 黄春菊)