Geiq ndaej ngoenz sihgiz seiq banhaet, mbwn laepngaungau, ngoenzneix dwg gou caeuq geij boux doengzhag cizyiz, sojyij couh gipgip muengzmuengz byaij bae hagdangz.

Goengmbwn caen mbouj rox guh vunz, gou ngamq baij haeuj bakdou hagdangz, naed- fwn lumj duhhenj neix couh daj gwnzmbwn dida dida doek roengzdaeuj, yaep he fwn naed couh bienq baenz fwnraq. Fwn yied doek yied hung, gou naemj: Ngoenzneix miz lauxsae diegrog daeuj hagdangz raeuz dingqgo, gyoengq doengzhag hix cingq bae hwnjdangz, gyoengqde itdingh mbouj dawz liengj, danghnaeuz gyoengqde deng fwn rwed couh mbouj ndei lo, roxnaeuz vih neix baenzbingh ne……Siengj daengz gizneix, gou couh ciucomz geij boux cizyiz duigan, doiq gyoengqde naeuz:“Ngoenzneix fwn doek, hojnaengz miz di lauxsae caeuq doengzhag mbouj dawz liengj daeuj, raeuz dawz liengj daengz bakdou ciep gyoengqde ba!” Gyoengq doih cungj doengzeiq, yienghneix, dou couh dawz haujlai liengj bae daengz bakdou hagdangz. Dahraix, miz haujlai lauxsae caeuq doengzhag ndwn youq laj yiemhranz bakdou hagdangz ndoj fwn. Muengh gijyiengh simgip gyoengqde, dou sikhaek hengzdoengh hwnj- daeuj, gang liengj soengq lauxsae caeuq doengzhag, daj bakdou hagdangz daengz gyauyozlaeuz, youh daj gyauyozlaeuz daengz bakdou hagdangz, youq gyang neix dou mboujrox byaij liux geijlai baez. Doeklaeng dawz gij lauxsae caeuq doengzhag sihyau bangcoh haenx cungj soengq daengz dieg lo.

Yienznaeuz mbwn miz di nit, hoeng dou moix soengq boux lauxsae roxnaeuz boux doengzhag ndeu, gyoengqde cungj doiq dou naeuz “docih”, couhdwg sing youh sing “docih” neix, hawj dou gamjdaengz raeujrub raixcaix.

Fwn dingz lo, daxgoeng daengngoenz ok- daeuj lo, ndaw hoengheiq gyuemluemz fwndoek sat gij heiq namh homfwtfwt haenx, gij heiq nei mbin henz ndang gou, de lumj doiq dou gangj:“Ngoenzneix sou guh le gienh saeh ndei ndeu. Sou caen dwg Leiz Fungh lij lix, gig liux mbouj hwnj ha!”

(指导老师：彭凤如)