Vihliux hawj gyoengq lwgnyez angq gvaq ngoenzciet swhgeij, youq “roetit” ciet lwgnyez yaek daengz gaxgonq, 5 nyied 30 hauh ngoenzneix, Vanzgyangh Mauznanzcuz Swciyen Swh’wnh Cin Yinzhoz Siujyoz、Sihnanz Siujyoz caeuq Cinghdanz Siujyoz sam aen hagdangz neix, faenbied youq ndaw hagdangz swhgeij gawjhengz vwnzyi byaujyenj caeuq youzyenz hozdung, angqhoh “roet it” ciet lwgnyez. Baez hozdung neix, cezmuz lai youh miz daegsaek, miz sausenhduiyenz haeuj dui yizsi, miz ciengq go Sawcuengh，miz diuq foux minzcuz, miz diuq foux faexsaux, miz gwih maxyaex, miz gveng daehsa……

Vihliux guh ndei angqhoh hozdung, gyoengq lauxsae 、hagseng cungj yungh govai seizgan son hag, lauxsae nyinhcaen son, hagseng haeujsim hag, nyengh dawz moix aen cezmuz lienh ndaej ndei bae. Ngoenzde, gyoengq gyahcangj yawj byaujyenj le, cungj haenh naeuz: Hozdung beij gaxgonq ndeiyawj lai lo, neix dwg caeuq hagdangz yawjnaek hagdangz minzcuz vwnzva gensez gvanhaeh gig daih, hawj gyoengq lwgnyez mboujdanh hag rox Sawcuengh, caemhcaiq dawz vwnzva Bouxcuengh ciepswnj roengzdaeuj.” (Mungz Ningz/蒙 宁)