1929 nienz nienzdaej daengz 1930 nienz nienzco, Guengjsae gak cuz lwgminz youq Cunghgung Cunghyangh daibyauj Dwng Siujbingz caeuq Cangh Yinzyiz、Veiz Bazginz daengj boux lingjdaeuj dazyinx lajde, guh le Bwzswz Gijyi caeuq Lungzcouh Gijyi song baez gijyi gingdoengh diegnamz guekcoj haenx, gonqlaeng laebbaenz hungzcizginh caeuq hungzbazginh, Lij Mingzsui guh boux cijveih song aen budui neix, Dwng Siujbingz guh boux cwng’veij, youq Dahcojgyangh、Dahyougyangh caeuq Dahraemxhoengz gij diegrangh neix, laebbaenz gunghnungz minzcuj cingqgienz, laebbaenz aen dieggoek gwzming saekhoengz seizde daengx guek angjda ndeu.

Aen dieggoek gwzming neix, bau’gvat Doenglanz、Bahmaj、Fung- sanh 3 aen yienh dieg cienzbouh, Bingzgoj、Denzdungh、Denzyangz、Baksaek、Linzyinz、Lozyez、Denh- dwngj、Ningzmingz、Lungzcouh、Duh'anh、Denhngoz、Nanzdanh daengj yienh dieg bouhfaenh. Ciuq bi 1964 gyonjgeiq, 15 aen yienh neix, gyonj miz 267.36 fanh vunz, ndawde miz 80 fanh dwg youq dieggoek dieglaux gwzming.

Vunzlai dieglaux youq ciengzgeiz gwzming doucwngh ndawde, vih gwzming saehnieb Cungguek lwgminz guh ok gung’yen gig daih.

Bing cujliz hungzginh bae diegbaek le, gozminzdangj fanjdungbai simyak dwk hangzgaj gij dieg neix. Daegbied youq Bahmaj、Fungsanh caeuq Doenglanz sam aen yienh neix, dingzlai deng coemh gaj 6~7 baez, ndawde, dieg cungsim dieggoek gwzming—Bahmaj Yen Sihsanh Gih, gonqlaeng deng vunzdig gunghoenx coemh gaj ndaej 16 baez. Fungsanh Yen Ginghlij Yangh miz aen mbanj ndeu, 130 hoh ranz, 600 lai vunz, deng vunzdig lai baez coemh gaj le, cij lw 30 hoh ranz, 80 lai vunz. Yienh Doenglanz yienzlaiz miz 10 lai fanh vunz, daengz bi 1934 cij lw 5 fanh lai vunz, ndawde gij dungzci camgya gwzming deng vutmingh caeuq gij vunzbiengz deng gaj haenx miz fanh lai vunz. Gaiq dieghoengz neix dwg youz gij lwed fouzsoq senhlez nyumx baenz.

(caengz sat)