Vangzsam youq aen swyez danhvei gunghcoz, bingzseiz gig launyaenq, gaenq ndaej 30 lai bi lo, bungz raen dahsau naj lij hoengz- fwdfwd, ngaem gyaeuj byaij gvaq bae, caj dahsau byaij bae gyae le, cij nyaenx mbouj ndaej ngeux gyaeuj dauq laeng yawjyawj.

“Lau gijmaz，beixnuengx, ei mwngz baenzneix guh,mbouj rox daengz seizlawz cij aeu ndaej mehyah?”Ndaw danhvei gyoengq beixnuengx cungj gip dwk,ciengzseiz gienq de. Hix miz gyoengq mehmbwk gaisau dahsau hawj de, hoeng daihgya caez gwn caeuz seiz, Vangzsam yawj cungj mbouj gamj yawj dahsau, cij goq ngaem gyaeuj gwn ngaiz. Dahsau couh nyinhnaeuz ndaek bouxsai neix caen huk, danghnaeuz mbouj dwg huk couh dwg miz bingh, seizneix dahsau lawz cingznyienh caeuq cungj bouxsai neix gvaq saedceij ha! Vangzsam hix lau, lau yawj aenaek dahsau sangngaungau caeuq fajnaj hoengzmaeq haenx. Doeklaeng, Vangzsam lij bouxdog saeg buh cawj ngaiz, gyanghaemh gag bek nyungz.

Vangzsam ciengzseiz ninz youq gwnz mbonq naemj：“Seizlawz cij miz bouxbuemx ne?”“Baezlaeng itdingh mbouj loek bae lo!”Vangzsam haeb heuj dwk, dik aen congz geij baez, ninz ndaek bae lo.

Mboengqgonq ndaw danhvei miz dahsau ndeu heuh Siujyingz, ngamq diuh haeujdaeuj, aen daiz bangungh de couh caeuq Vangzsam doiqnaj,Vangzsam mbouj gamj cingqmienh bae yawj saek baez. Vangzsam cij raen dahsau byoem ndaemndatndat, lij dingqnyi gij sing’yaem dahsau gig ndeidingq haenx. Couh baengh gijneix,Vangzsam youq ndaw sim gag ngeix fajnaj dahsau lwenzlili, fouq lwgda rox gangjvah caeuq gij heuj hausaksak haenx.

“Danghnaeuz caeuq dahsau neix gvaq saedceij, couhsuenq hwnj byasang roengz feizgyaz, gou hix cingznyienh!”Vangzsam baeznaengz raen dahsau byoem ndaemndatndat haenx, ndaw sim gag ngeix.

Ngoenzndeu roengz ban le,Vangzsam raen Siujyingz byaij haeuj cizgungh suzse le, ndaw sim hoengqlanglang. Vangzsam sawqmwh gamjdaengz swhgeij lau dai, hozndat dwk dik aen rin iq henzloh.

Gyanghaemh, gyoengq baengz youx cingj Vangzsam bae ndoet laeuj, Vangzsam ndoet laeuj mbouj lai, mbouj siengj bae.“Mwngz siengj bae gyaep Siujyingz lwi? Mbouj siengj couh gaej daeuj!”Gyoengq baengz- youx naeuz. Miz boux ndeu youh nem youq aenrwz Vangzsam son de baenzlawz bae gyaep Siujyingz.Vangzsam baez dingq gangj daengz Siujyingz, ndaw sim couh unq liux.

Gwn caeuz seiz, ronghdaeng yapmyad, singmax mboujduenh. Lienz ndoet sam boi le, Vangzsam naj hoengzfwdfwd, lumj gaeqmeh ngamq ok gyaeq nei. Song gienh laeujbizciuj ndoet liux lo, Vangzsam gaenq luenh gangj sam ciengz, luenh diuq luenh ciengq lo.

“Vangz daeggo, seiqgyaiq baenz- neix gvangq, couh mboujmiz saek dahsau hab’eiq mwngz ha?”Gyoengq- vunz gangjriu naeuz.

“Miz …… miz……dwg……miz, hoeng …… hoeng ……” Vangzsam saekaek dwk naeuz.

“Bouxlawz ha?”Youh miz vunz cam.

“Dwg Siujyingz, dah ngamq daeuj haenx!”Youh miz vunz bang de han.

Vangzsam doeksaet dwk, vueng dwk naeuz：“Sou cungj rox la?”Miz vunz naeuz：“Maij couh maij lo,danghnaeuz maij couh bae lwnh de nyi ha.”“Gojnaengz de hix maij mwngz ne?”“Sikhaek daj denva hawj de.”

Vangzsam yied dingq yied gamjdaengz miz dauhleix, sikhaek daj denva hawj Siujyingz.

“Vei! Mwngz ndei, gou dwg Siujyingz, mwngz dwg bouxlawz?”Ndaw soujgih cienzdaeuj sing seuq- dang haenx. Vangzsam dingq gij sing haenx,laeujfiz lumj singj le dingz ndeu, sikhaek naeuz：“Mwngz ndei ha! Gou dwg Vangzsam ha! Siujyingz mwngz gwn caeuz caengz?”

“Mwngz ra gou miz maz saeh ha?”

“Mboujmiz, mboujmiz, dandwg siengj coh mwngz camndei.”

“O, yienghneix ha, docih mwngz. Gou nyaengq lo, ndaejhoengq caiq gangj! Caiqraen!”

“Caiqraen!”

Cuengq denva le, Vangzsam gamjdaengz swhgeij mboujmiz gijmaz bonjsaeh, youh riengz gyoengqvunz ndoet geij boi. Caiq hai song gienh laeuj, Vangzsam gaenq fiz yaek dai lo,ndwn mbouj onj, ninz youq gwnz sahfaz lo. Geij boux baengzyoux myox da, caez ram Vangzsam bae cuengq youq bakdou suzse Siujyingz.

Ngoenz daihngeih mbwn loq rongh seiz, Vangzsam singj gvaqdaeuj,raen swhgeij ninz youq bakdou suzse Siujyingz, roxnyinh catsaij lo, sikhaek hwnqndang buet deuz. Byawz rox goenglaux fat saenq hwnj ndaej caeux,de yienznaeuz dava, lij mungzlungz yawjraen Vangzsam daj suzse Siuj- yingz byaij okdaeuj.

“Vangzsam, mwngz caeux ha!”Goenglaux singhung dwk naeuz,lauheiq Vangzsam dingq mbouj ndaej nyi nei.

“Daxgoeng caeux!”Vangzsam sing daemq han, couh buet ma suzse lo.

“Seizneix bouxcoz caen vuen- yungz!” Goenglaux ngauzgyaeuj dwk.

Vangzsam cingjgyaj youq ndaw ranz geij ngoenz.

Gvaqlaeng, gyoengq baengzyoux mboujguenj miz gijmaz saeh, cungj cingj Vangzsam bae ndoet laeuj,baeznaengz cungj siengj banhfap hawj Vangzsam fiz bae, couh ram de bae daengz bakdou Siujyingz. Gyanghaet mbouj dwg deng Lij daxgoeng raen,couh dwg deng Cangh daxbuz bungzraen.

Mbouj geij nanz, ndaw danhvei cungj rox Vangzsam gyanghaet ciengzseiz daj suzse Siujyingz byaij “okdaeuj”. Boux siengj daeuj caeuq Siujyingz gyau baengzyoux haenx dingqnyi aen siusik neix cungj lizhai lo. Vangzsam hix gaijbienq gij mauzbingh swhgeij, ra lijyouz bae caeuq Siujyingz gangjgoj, gunghcoz seiz ciengzseiz bangcoh Siujyingz.

“Doiq neix caen doxgyaez ha!”Vunz ndaw danhvei cungj gangj.

Gvaq bi ndeu, gyoengqvunz sou ndaej mbaw cingjdiep Vangzsam caeuq Siujyingz gezvwnh haenx.