Seizhah mbwn ndataeng, mbangj mehmbwk lij ciengz naeuz lau nit, neix dauqdaej dwg maz yenzyinh ne? Gaengawq gij gietlwnh yihyoz yenzgiu naeuz, neix cujyau yenzyinh dwg ndaw ndang noix diet.

Gyoengq conhgyah nyinhnaeuz, bouxsai doengzyiengh hix miz cungj cingzgvang neix, mboujgvaq, bouxsai gwn doxgaiq haemq lai, seiqseiz ndaej boujcung diet, mehmbwk cix youq mwh dawzsaeg seiz sied bae haujlai diet. Danhfanz gij mehmbwk lau nit haenx, wnggai bae ra canghyw genjniemh diet youq ndaw lwed hamzliengh miz lainoix.

Vihneix, gyoengq conhgyah genyi naeuz, gij mehmbwk ndang noix diet haenx, seizhah wngdang lai bouj diet, lai gwn di gijgwn hamz diet lai haenx, lumj nohcing、nohbya、nohgaeq、gij huq aeu duh guh、gij rag doenghgo wnq、gij doenghgo mbawloeg daengj; caemhcaiq youq canghyw cijdauj lajde, ciengzseiz bouj gwn di diet doxgaiq he.

(Hoz Sauyenz)