Gij gwnndoet lwgnyez wnggai cit di, danhseih seizhah ok hanh lai, gyu ndaw ndang hix gaenriengz sied bae lai, lwgnyez ciengz okyienh rengz naiq、mbwq gwn daengj yienghsiengq. Cawjranz ndaej youq ndaw byaek habdangq lai dwk di gyu ndeu, aeu daeuj boujcung gyu ndaw ndang de sied bae haenx. Hoeng, conhgyah daezsingj naeuz, mbouj ndaej gwn gyu daiq lai, mboujnex, miz haih lairaeuh bw. Itbuen daeuj gangj, lwgnyez seng ndaej 8 ndwen dauqndaw gijgwn de gaej yungh dwk gyu; bi daengz song bi lwgnyez, gijgwn de moix ngoenz dwk 0.8 daengz 1.5 gwz gyu couh ndaej, mbouj hab dwk daiq lai.

Seizhah hawj lwgnyez bouj gyu cujyau dwg hawj de gwn cuk caeuq raemxdang. Lwgnyez ok hanh lai, gyaz、naz daengj gvangvuzciz hix couh sied bae lai. Lai gwn cuk caeuq raemxdang, mboujdanh ndaej bouj raemx hawj aenndang, lij ndaej boujcung gyaz caeuq naz dem, fuengz lwgnyez mbwq gwn、rengz naiq, caemhcaiq ndaej fuengz fatsa.

Linghvaih, cawz bouj gyu le, cauj byaek seiz aeu bienq guh lai cungj lai yiengh, fuengz de mbwq gwn. Lauheiq lwgnyez baenz dungxraeng, ndaw ranz wng bwh miz yw siu cwk hawj de dem.