Gaenh bi daeuj, Lozcwngz Mulaujcuz Swciyen mboujduenh gyarengz onjbouh doihaeuj gensez goengloh lajmbanj. Ciuq cam rox, bi- gvaq, aen yienh neix roengz 5456 fanh maenz, guhbaenz 14 diuz 81.4 goengleix roensuijniz doeng mbanj. Daengz dangqnaj, daengx yienh 103 aen mbanj doeng roensuijniz, gungh raez 208.57 goengleix. Goengloh guh doh 11 aen yangh(cin) 92 aen cunh、 giz vat gvang hung、 lijyouz gingjdenj daengj, gihbwnj guhbaenz aen gyauhdungh vangjloz“hung’iq dox- boiq、 seiqcawq doxdoeng”.

“Bineix, caenh’itbouh comz ndei cienzngaenz guh roen lajmbanj, hawj gij cunh doeng goengloh seiq gaep de ciemq daengz 90% doxhwnj, gij cunh doeng roensuijniz de ciemq daengz 95% doxhwnj, gij mbanj doeng goengloh mbanj gaep de ciemq daengz 85% doxhwnj.”Aen yienh neix boux yencangj Yinz Banghgwz naeuz, bineix aeu haenqrengz doihaeuj gyauhdungh hanghmoeg hung gensez, aeu guhbaenz diuz goengloh ngeih gaep daj Lozcwngz daengz Liujcwngz（duenh Lozcwngz）de、diuz roenzsuijniz daj Vaizginz Dungh’anh daengz Yizcouh Siengzvei daengj, mboujduenh gyavaiq guh roensuijniz doeng mbanj nem goengloh mbanj gaep. (Liu Gvanghfuz)