Seiz lij iq, gou mbouj rox daxmeh guh gijmaz hong, caenh rox de gingciengz caeuxcaeux couh okbae, daengz laep cij haeuj ranz. Mwhhaenx gou gig noix ndaej raen naj daxmeh, aenvih gou caengz hwnq, daxmeh couh okbae lo; gou ninz ndaek lo, daxmeh cij dauq. Ndaej hoengq seiz, gou couh cam daxboh:“Daxboh, gou haujlai nanz mbouj raen daxmeh lo, daxmeh bae guh gijmaz la?”Daxboh naeuj naeuj fajnaj gou, naeuz:“Daxmeh gig hungmbwk, de ndaej dawz aen singz raeuz bienq ndaej engq gyaeundei, de dwg boux ‘hawsingz meijyungzswh’!”Dingq daengz gij vah daxboh, ndaw sim gou gig angq, caemh vih miz boux daxmeh yienghneix roxnyinh miznaj. Bingzseiz roeb vunz, gou cungj gig miznaj dwk naeuz:“Daxmeh gou dwg ‘hawsingz meijyungzswh’!”

Ciemhciemh, gou majhung lo, caemh roxdaengz daxmeh gizsaed dwg boux sauqgai, ndigah, doeg siujyoz seiz, gou gig noix youq dangqnaj gyoengq doengzhag dwen daengz daxmeh. Miz baez ndeu, roengz dangz le, dou geij boux itheij lwnhgoj, lwnh daengz “gunghcwngzswh” aen swz neix seiz, Yangz Vaz saenzheiq dwk naeuz:“Meh gou couh dwg boux Gunghcwngzswh mizmingz ndeu!” Dingq de yienghneix naeuz, gyoengq doengzhag bouxboux cungj foenfoen naeuz meh bonjfaenh dwg guh gijmaz, gou ndwn youq gizhaenx mbouj gangj saek coenz. Sat le, miz vunz cam gou:“Gyah, meh mwngz dwg guh gijmaz la?”Gou doeksaet le, yaek gangj yaek mbouj gangj dwk naeuz:“Cam …… ma ……guh gijmaz? Rox doengh …… gijneix ……doiq sou miz gijmaz ndeicawq?”Gangj sat, gou ganjvaiq deuz lo, mbouj rox bouxlawz naeuz:“Geij cam de lo, gizsaed daxmeh de dwg boux sauqgai ndeu!”“Boux sauqgai ……”Miz vunz sing sang dwk hemq naeuz, gaenlaeng, haujlai vunz cungj riu hwnjdaeuj. Mwh haenx gou gig haemz, caen siengj ndoj haeuj ndaw congh bae ciengx- lwenx mbouj okdaeuj, ndaw sim gig huj daxmeh: Guh gijmaz mbouj ndaej, bae guh boux sauqgai!

Daj mwh haenx hwnj, gou gagog hwnjdaeuj, mbouj caiq caeuq gyoengqdoih gangjgangj riuriu, caemh mbouj hawj daxmeh daeuj hagdangz cimh gou. Mboujguenj hai gijmaz hoih, gou cungj dwg hawj daxboh daeuj.

Baez ndeu, yaek cuengqhag seiz, mbwn bienq laepcupcup, yaepyet fwnraq bongh roengzdaeuj lo. Gou naemj: Sat lo, daxboh bae okcai, mbouj ndaej daeuj ciep gou lo, bingzseiz gou cungj naeuz daxmeh, mbouj cinj de daengz ndaw hag dou, seizneix yaek baenzlawz baema ne? Cingqdang gou mbouj rox baenzlawz guh seiz, lauxsae byaij daeujdaengz henz ndang gou, ndaw fwngz de gaem aen liengj ndeu, naeuz:“Cingq nyap mboujmiz vunz soengq liengj daeuj, mbouj rox baenzlawz guh? Dwg lwi?”Gou ngaekngaek gyaeuj, lauxsae ciep dwk naeuz:“Hawj mwngz, haxbaenh miz boux mehmbwk ndeu soemh fwn soengq daeuj hawj mwngz ……”Gou gipmuengz cam:“O，de gangj gijmaz lwi?”“De caenh daengqnaeuz mbouj hawj mwngz soemh fwn hung baema, deq fwn haemq iq le menh baema ranz. De caen gvensim mwngz, bonjfaenh deng dumz liux lo, lij mbouj guenj, fanj gvaqdaeuj dwg lau mwngz deng dumz.”Lauxsae gangj coenz vah neix sat le, couh byaij okbae lo, gag louz gou youq gizhaenx dauq- ngeix ……

Fwn menhmenh bienq iq lo, gou ganjgip buet bae ranz. Gou nyinh- naeuz daxmeh itdingh youq ranz, hoeng, gou yamq haeuj bakdou seiz, ndaw ranz caemrwgrwg, caengz raen gij ngumhngaeuz daxmeh. Fwn caengz dingz, de bae gizlawz ne? Gou ngeix dwk. Nanzdauh lij bae sauqgai? Gou doq siengj doq byaij ok bakdou, buet bae gizdieg daxmeh bingzseiz sauq haenx ……

Daengz gizhaenx, gou dauqcawq ra gij ingj daxmeh, hoeng, baenzlawz hix ra mbouj raen. Dauqdaej youq gizlawz ne? Gou ngeix dwk. Suenq lo, lij dwg baema ba. Mwh gou byaij deuz, raen henz aen ci ndaem ndeu gvaengz haujlai vunz. Ok gijmaz saeh lo? Gou nyaenx mbouj ndaej byaij gvaqbae, caenx haeuj ndaw vunzlai bae, baez yawj, raen daxmeh ndwn youq gizhaenx, boux hauxseng ndeu cik fwngz ndeu vix daxmeh naeuz：“Mwngz suenq gijmaz doxgaiq, gamj loengh uq aen ci gou, aen ci gou dwg Baujmaj, danghnaeuz deng gvet va, mwngz boiz ndaej hwnj lwi?”Daxmeh ndwn youq gizhaenx, mbouj gangj saek coenz, caenh dingq boux hauxseng neix ndaq, “gou mbouj guenj lo, mwngz sikhaek swk cengh, mboujnex, gou naeuz lingjdauj mwngz nyi, hawj mwngz mbouj miz hong guh!” Dingq daengz neix, gou nyaenx mbouj ndaej lo, siengj cung hwnjbae, rag daxmeh baema, hoeng, mwh gou yamq din okbae seiz, daxmeh gangjvah lo:“Daegmbauq, dwg gou sauq mbouj siujsim, sauq naez sinz deng aen ci mwngz lo, gijneix dwg gou loek, doiq mbouj hwnj lo, mbouj yungh mwngz naeuz, gou cungjdwg wnggai swk cengh aen ci mwngz, hoeng, mwngz gangj vah caemh aeu miz cikconq, gou dwg boux sauqgai, mbouj loek! Hoeng, mwngz mbouj wnggai yawj mbouj hwnj gyoengqdou, danghnaeuz mboujmiz gyoengqdou, aen ci mwngz engqgya uq!” Coenz vah neix baez dingz, seiqhenz yiengj hwnj sing bek fwngz gig gok, gyoengqvunz foenfoen coeg naeuz boux hauxseng haenx, boux hauxseng haenx baez najhoengz, vut coenz vah ndeu naeuz：“Suenq lo, suenq gou boihseiz, mbouj caeuq mwngz gangj baenzlai.”Gangj sat le, ganjvaiq ndonj haeuj ndaw ci bae, hai deuz lo. Seizneix, fajnaj gou caemh gig ndat: Dwg ha, daxmeh vihliux mbouj hawj gyoengqdou ngoenznaengz swnghhoz youq ndaw nyapnyaj, gaiq gunghcoz de dwg boux ndeu uq vuenh daeuj haujlai vunz cengh ha! Nanzdauh gou lij yawj mbouj hwnj daxmeh la? Gou lij dwg dahlwg de lwi? Gou mbouj caiq ngeix baenzlai, sam yamq guh song yamq byaij daengz dangqnaj daxmeh. Daxmeh baez raen gou, doeksaet dwk naeuz:“Mwngz daeuj gizneix guh gijmaz?” Gou nyaenx mbouj ndaej lo, daej dwk got daxmeh naeuz:“Meh, gou loek lo, mbouj wnggai yawj mbouj hwnj mwngz, yienzliengh gou, ndaej lwi?”Daxmeh itmienh swk raemxda hawj gou, itmienh naeuz：“Dah lwg huk gou, daxmeh caengz huj mwngz gvaq, gaej daej lo, mboujnex yakyawj lo, yienghhaenx, daxmeh couh mbouj gyaez mwngz lo.” Dingq gij vah daxmeh le, gou sikhaek swk cengh raemxda, doiq daxmeh naeuz：“Gou caeuq mwngz itheij sauq ba!”“Ndei!”Daxmeh han naeuz. Gyoengqvunz gvaengz haenx youh bek fwngz hwnjdaeuj, boux vunzlaux ndeu naeuz:“Dahnuengx ha, meh mwngz gig fucwz, cijaeu dwg de hwnjban, gizdieg neix cungj dwg seuqsaksak, hawj vunz gamjdaengz sim gig langh. Mwngz ndaej lijgaij daxmeh dwg deng lo.” Gyoengqvunz cungj yaengx hwnj lwgfwngz meh, mwh haenx, gou gamj- daengz gig miznaj, gaem sauqbaet caeuq daxmeh itheij sauq hwnj- daeuj ……

Seizneix, gwnzsingz lajmbanj cungj guh “singzyangh cinghgez gungcwngz”, daxmeh engqgya nyaengq lo, gou gingciengz naeuz de, hawj de lai yietbaeg, daxmeh cungj naeuz：“Mbouj youqgaenj, aen singz raeuz bienq ndaej seuqcengh gyaeundei, gou sim cij onj!”Dingq coenz vah neix, gou engq boiqfug daxmeh !

（指导老师：黄素艳）