Moixdang bouxwnq gangj daengz duz malwg seiz, gou couh siengj hwnj doengzdoih ndei gou “daeghenj”, gou youq ndaw sim nambedbed: “Daeghenj”, mwngz youq gizlawz, mwngz seizneix baenzlawz yiengh la, lij geiq ndaej naj gou lwi?

“Daeghenj” yenzlaiz dwg duz malwg ranz daxda gou. De gig dwggyaez, lwgda youh ndaem youh ndongq. De daengx ndang bwn henj- rwgrwg, ndang bizbwdbwd, byaij loh hwnjdaeuj niuj bae niuj dauq. Bingzseiz, dujrwz de boeb dauq laj, hoeng baez dingqnyi sing’yaem couh sikhaek daengj hwnjdaeuj, “vang vang” dwk raeuq mbouj dingz.

Moix baez gou bae ranz daxda, daeghenj yawjraen gou, couh angq dwk diuqbwngbwng, de aeu song cik galaeng ndwn dwk, song cik nyauj naj caeuq gou doxgaem, yienghceij dwggyaez raixcaix. Seizneix, gou couh dawz gij ndok miz di noh de ceiq gyaez gwn haenx hawj de gwn, de gamz gij ndok couh buet bae henz rongz iq swhgeij menhmenh gwn hwnjdaeuj lo.

Daeghenj gig roxsoq, baez yawjraen vunz mbouj sim’angq seiz, de couh caemrwg dwk boemz youq giz ndeu, di hix mbouj doengh, cij aeu lwgda rox gangjvah haenx yawj mwngz, lumjbaenz lawh mwngz faendan gij yousim. Miz seiz, gou miz simsaeh couh lwnh hawj de, de lumjbaenz dingq ndaej rox, iet fajnyauj iq daeuj lumhlumh gou, yaepyet, gou roxnyinh simcingz bienq ndaej ndei lai lo, gou engqgya gyaez de. Danghnaeuz miz mboengq ndeu mbouj raen daeghenj, gou couh siengjniemh de.

Doeklaeng, daxda gou gvaqseiq lo. Daeghenj mbouj raeuq lo, hix mbouj siengj gwn doxgaiq lo. Aenvih itcig cungj dwg daxda gueng de, de roxnaeuz mbouj sibgvenq lingh boux vunz gueng de ba, ndigah de menhmenh byoem bae lo, de lumj- baenz gig siengjniemh daxda. Daxdaiq raen de gig hojlienz, couh dawz de soengq hawj bouxwnq lo. Gou rox le, siengsim raixcaix, lumjbaenz saet bae boux doengzdoih ndei lo.

Gou siengj: Roxnaeuz baezlaeng caiq hix yawj mbouj raen daeghenj lo, mbouj rox de lij geiq mbouj geiq ndaej gou dem. Hoeng gou maqmuengh de youq ranz bouxcawj moq gvaq ndaej engq ndei!

（指导老师：覃雪芹）