Daeuhfouh gyoet ndaej gyangq hezcij, dwk de haeuj binghsiengh bae yo le, soj hamz yingzyangj doxgaiq lumj danbwzciz、youzlauz、gai、linz daengj cix mbouj dwg aenvih gyoet le deng sied bae, mbangj yingzyangj ginggvaq cienjbienq le dauqfanj doiq ndang vunz miz ik. Ndaw daeuhfouh gyoet hamz miz mbouj baujhozcihfangzsonh, de ndaej gyangqdaemq danjgucunz, ndawde gij lonjlinzcij youq ndaw ndang vunz habbaenz danjgenj, ndaej fuengz bouxvunz baenz doenghmeg giet ndongj. Ndigah, boux hezcij sang mboujfuengz gwn di daeuhfouh gyoet he.

Gij huqsoemj ndaw daeuh- fouh lij ndaej supsou youzlauz ndaw saej, ciengzseiz gwn ndaej baiz youzlauz okdaeuj; de hamz miz danbwz doenghgo gig lai, hix naengz laengzdangj supsou danbwz doihduz; gij cenhveiz de, ndaej coicaenh dungxsaej noddoengh.

Danhseih aeu haeujsim dwg, daeuhfouh gyoet ceiq ndei dwg dwk raemxsaw cawj, danghnaeuz dwk roengz ndaw hojgoh bae cawj, de rox supsou youzlauz haeujbae, vunz gwn le dauqfanj doiq gengangh miz haih.

Ndaw daeuhfouh gyoet hamz byauling cwngzfwn gig lai, boux baenzin caeuq boux lwed niusonh gwd lai youq mwh cingq baenzbingh seiz mbouj ndaej gwn.