Danghnaeuz cam gou bouxlawz hawj gou ceiq boiqfug? Gou itdingh gangj dwg daxmeh gou.

Daxmeh gou dwg boux vunz gig bingzciengz ndeu. Hoeng youq ndaw sim gou, de dauqfanj hawj gou ceiq boiqfug. Daxmeh miz doiq lwgda ndongqliklik ndeu, aenndaeng de gig ndeiyawj, gyaeuj byoem de ndaemndwtndwt. Gou gig gyaez daxmeh gou.

Daxboh gou itcig youq baihrog dajgoeng, ndigah saehcingz ndaw ranz cungj gauq daxmeh boux ndeu gag guh.

Meh gou gig gingqcoengh bouxlaux. Miz baez ndeu, daxbuz mbouj siujsim fwngz deng gvej lwed lo, daxmeh gipmuengz bang daxbuz suek ndei diegsieng. Aenvih sieng naek, yienznaeuz lwed dingz lo, fwngz daxbuz lij caengz gag doengh ndaej. Vihneix, baez daengz gwnhaeux, daxmeh cungj sien bwnq daxbuz gwn. Caj daxbuz gwn imq le, daxmeh caiq gwnhaeux seiz, ngaizbyaek cungj liengz lo. Moix baez yawj daengz yienghneix, gou cungj deng daxmeh yienghneix hauqswnh gamjdoengh dangq- maz. Gou siengj:Gou wnggai vih daxmeh lai guh di saeh, hawj daxmeh mbouj sinhoj, lai yietnaiq. Hoeng, gou guh mbouj daengz. Daxmeh lij dwg moix ngoenz nyaengq daengz byonghhwnz, ranz caengz rongh couh hwnqcongz guh hongranz lo. Daxbuz gou baez raen vunz cungj haenh:“Gou naengz miz lwgbawx ndei neix, caen dwg ciuhgonq gou miz fukfaenh ha !”

Daxmeh couh dwg bouxvunz yienghneix, youh ciuqgoq daxbuz, youh ciuqgoq gou, coengzlaiz mbouj gangj gijmaz hoj.

Gou caen boiqfug Daxmeh gou.

（指导老师：彭凤如）