Aenneix dwg aen dijyuzgvanj yienhdaihvaq ndeu. Ciemq dieg 5 fanh lai bingzfuengmaex, gij gaiqcaep gyonj dieg gvangq 1 fanh lai bingzfuengmaex. Guh miz gij ranzyietnaiq bouxyinhdoengh、bouxcaizbuenq、vunzhong、hekgviq haenx caeuq diengzsaw、ranzdajcaemx、ranzboiqdienh、ranzgvaloz、ranzcang、dienh- doengh geiqseiz geiqfaen daengj sezbei. Gij diegdoxdax benjdieg faex raez 44 maex, gvangq 24 maex. Nengzranz gungj sang 54 maex, seiqbaih doengrumz, miz 5200 aen daengq. Ndaej youq neix doxdax lamzgiuz、baizgiuz、soujgiuz、bingh- banghgiuz、vujsuz、dijcauh、gwednaek daengj hanghmoeg, caemh ndaej guh gij biujyienj vwnzyi、hoihbauqlwnh、hoihgangjyienj daihhingz haenx.

Aen Gvangjsih Dijyuzgvanj seizde daengx guek itlouz neix, dwg Veiz Gozcingh dangmienh cingjgouz Ho Lungz fucungjlij dingjrengz cix ndaej hwnj ne.

Ho Lungz fucungjlij bi 1958 ndwen 3 daibyauj dangjcunghyangh caeuq gozvuyen daeuj camgya hoih- angqhoh laebbaenz Gvangjsih Bouxcuengh Swcigih le, bi 1959 ndwen 2 youh daengz Gvangjsih ngonzcaz baez dem.

Veiz Gozcingh guh gyoeblwnh hawj de le, cingjgouz boux yenzsai giem guh cujyin Guekgya Dijveij neix, bang youq Namzningz hwnj aen dijyuzgvanj cunghab yienhdaihvaq ndeu.

Haidaeuz, yenzsai lij miz di ngeiz. De naeuz, daengx guek haujlai swngj cungj iugouz youq dieg gyoengqde guh dijyuzgvanj, sou dijyuz bouxak mbouj lai, youq dieg sou hwnj lau mbouj daiq habdangq ba!

Veiz Gozcingh naeuz:“Yenzsai gaej yawjsiuj Gvangjsih bw, Guengjsae youq dijcauh、binghbanghgiuz daengj fuengmienh, miz mbangj miuz ndei bw!”

“Gou mbouj dwg yawjsiuj Gvangjsih, Gvangjsih daengzcog goj ok ndaej vunzcaiz yijyuz, hoeng seizneix daj cingjdaej bae yawj, lij doeklaeng di.”(caengz sat)