Sai: Sam nyied ganj hawfwen

Muengz geij ndwen mbouj dingz

Doiq fwen miz gamjcingz

Vunz mbouj cingj gag bae

Sau: Hawfwen vunz lailai

Miz mbwk sai ra youx

Danghnaeuz ndaej saek boux

Haeuj dou angqfwngfwng

Sai: Nuengx sau lumj vasien

Mbauq biengz cien boux vaenq

Nuengx gyaj yawj mbouj raen

Dan maij gaen beix huk

Sau: Beix mbauq youh bakgvai

Beij vunzlai coengmingz

Guh gwiz miz vunz dingh

Lwgsau sing guhyoux

Sai: Beix aeu ganj hawfwen

Sam ndwen mbouj dauq ranz

Saeg dak youq byaicanz

Nuengx henzranz bang sou

Sau: Beix yaek bae hwnjdou

Cib miz gouj cingz baenz

Danghnaeuz saeh dwg caen

Nuengx dawz ngaenz bae hoh

Sai: Beix mbouj dwg hwnjdou

Siengj lijyouz baez ndeu

Nyi fwen couh bae eu

Gvaq geuq haeuj haw moq

Sau: Haeuj haw ra vacwx

Yap vafwz daeuj cimz

Gveng henzranz saugim

Liengzsim youq gizlawz

Sai: Vwnzva aeu gyauhliuz

Gung gomiuz Fwencuengh

Vwnzva yizcanj vuengh

Muengh ginghci mbefat

Sau: Beix ganj haw dwg seiz

Vih daz ndei Fwencuengh

Song raeuz gap baenz sueng

Lumj bya cuengq roengz haij