Boux suhgi laux、cujsiz laux Cangh Yinzyi caemh haemq gvansim laebdaeb hwnj diuz giuzhung neix, de caemhcaiq raiz saenq hawj Lij Fucunh fucungjlij, genyi Guekgya Giveij bangdingj.

Bihaenx ndwen 4 ngoenz 25, Guekgya Giveij cingqsik han naeuz: Gij saenq Yinzyi dungzci caeuq Gozcingh daengj dungzci raiz hawj Fucunh caeuq Cinz Yi dungzci haenx gaenq sou daengz. Doengzeiq cuengq guh diuz giuzhung neix haeuj gij giva hwnjguh goekdaej bi 1963 bae, laebdaeb guh dem. Lij buet le ngaenz、gangcaiz caeuq suijniz hawj hangh hongloet neix.

Aenvih ngaenzgoek caeuq sam caiz cungj daengzvih lo, hwnj diuz giuz neix ndaej daihdaih gyavaiq. Veiz Gozcingh doenghbaez bae dieghong ngonzcaz gvaq, dingq gij vunzgaemhong dieghong gyoeblwnh, bang gyoengqde gejnanz.

Bi 1964 ndwen 7 ngoenz 15, gij hongloet cawjdaej giuzhung gezgou ganggingh vwnningzduj, yiengh caet congh venjgen, raez gyawj 400 maex haenx guh baenz, caemhcaiq hawj vunz byaij. Daj neix hwnj, songhenz Dahyunghgyangh Namzningz Si ciengzgeiz baengh naengh ruz gvaq dah duenh lizsij neix satbyai lo.

Ndaej diuz giuz gvaq dah ndeu, dwg aen siengjmuengh lai bi daeuj vunzlai ndaw singz Namzningz ndeu. Giuzhung cingqsik doeng ci ngoenzde, vunzvunz angqyangz vuenheij, daj seiqmienh betbaih doxcanj buet coh gwnzgiuz, lumhmo gij gungjgiuz hausak, saeqyawj gij doz miz daegsaek Bouxcuengh gwnz lanzgiuz haenx, haenhdanq mbouj liux.

Veiz Gozcingh diuhliz Guengjsae gvaqlaeng, buenxdoengz gaijgwz hailangh caeuq ginghci fazcanj, 80 nienzdaih caeuq 90 nienzdaih youh gonqlaeng hwnj le Giuz 2 、Giuz 3、Giuz 4 Yunghgyangh. Diuz Giuzhung Yunghgyangh 30 lai bi gonq guh baenz haenx, gaenq bienq baenz Giuz 1 Yunghgyangh lo, seizneix de ciuqgaeuq rap dwk gij hongnaek guh diuzroen cujyau gyaudoeng namzbaek Namzningz Si haenx.

Giuzhung Yunghgyangh guh baenz mbouj geij nanz, bi 1966 ndwen 2 youq baihnamz de hwnj le aen gaiqcaep hungsang ndeu—Guengjsae Dijyuzgvanj.

(caengz sat)