Dujva Sawcuengh ndei

Ciengzseiz rang youh moq

Rang doh daengx guekcoj

Daengz gak hoh gak ranz

Miz di vunz mbouj rox

Laihnaeuz boq daihvah

Youq dieg Cuengh hai va

Guhmaz rang doh guek

Cunghyangh gozvuyen

Daj senq seiz ung ceh

Ngamq didngaz dok nye

Couh ce hawj ngaenzhangz

Yaenq youq laeng ngaenzceij

Loegcib geij cin cou

Bingz ngaenz moq ngaenz gaeuq

Mbawmbaw miz Sawcuengh

Haujlai vunz ndi rox

Sawcuengh yo ndaw ranz

Yo ndaw daeh gwnz ndang

Gaem gyangfwngz gai cawx

Vah youh gangj dauqma

Va Sawcuengh hoengzmaeq

Seng youq sinh sevei

Dingj ndaej fwn ndaej rumz

Mwh cib bi doenghluenh

Sawcuengh hix deng cai

Caen yungyiemj dahraix

Caeklaiq rag de raez

Doenggvaq cin dauqdaeuz

Mbwn raeuj fwnraemx lai

Vah Sawcuengh fuk hai

Rang daihdeih guek raeuz

Guekgya gwnz daengz laj

Demgya lai vunz ganq

Suenva haeuj hagdangz

Va hai rang engq moq

Dujva Sawcuengh ndei

Seiqgeiq maeq youh hoengz

Cin hah daengz cou doeng

Ciengxlwenx hoengz ndi bienq