Youq seiz guh hozdung “sam nyied sam Bouxcuengh”de, Liujcouh Si minzcuz yijvwnz bumwnz cizgiz camgya hozdung ndawbiengz, youq lai giz aeu lai cungj hingzsik gya haeuj vah saw minzcuz, hawj hozdung yienj- ok daegsaek minzcuz, hawj ngoenzciet lai hoengh.

Ciuq cam rox, Liujcouh Si gak sigih、 yienh aeu sam cungj fuengsik baijok vah saw minzcuz. It dwg youq ndawbiengz guh le gangj gojgaeq、siengsingh siujbinj、ciengq go daengj hozdung seizde, aeu Vahcuengh、Vahdungcuz、Vahmyauzcuz daengj lai cungj vah minzcuz daeuj gangj、ciengq. Ngeih dwg youq giz veicangz daeuz gak dieg guh “sam nyied sam” hozdung de, venj、sij gij fukvang、byauhyij aeu Sawcuengh、Sawdungcuz sij de. Sam dwg youq hozdung gvangjcangz、segih、gwnz haw、sokloh gak yanghcin, coq gij denswj bingzmu、 fukvang、byauhyij aeu Sawgun nem Sawcuengh roxnaeuz Sawdungcuz song cungj saw caemh sij de. Ciuq gyoepsuenq, youq seiz guh hozdung“sam nyied sam Bouxcuengh”de, daengx si yungh gij denswj bingzmu、fukvang、byauhyij aeu saw minzcuz sij de gungh miz 59 diuz(aen).

(Lij Yinzciz)