Byoem loenq. Mehmbwk ndang daiq byom, lauz caeuq danbwzciz ndaw ndang gunghawj mbouj gaeuq, byoem couh mboujmiz yingzyangj, mboujmiz ndongqrongh, ndigah byoem couh yungzheih loenq.

Ndok soeng ndok byot. Mehmbwk ndang daiq byom, swjsinggizsu couh mbouj gaeuq, yingjyangj daengz gai caeuq ndok giethab, ndok couh maj mbouj laep, couh cauhbaenz ndok soeng ndok byot, hix yungzheih raek.

Dungx doekduiq. Mehmbwk gemjbiz seiz ciengz dwg gamjdaengz amqbak mbouj ndei、aek ciengq, gwn haeux sat ndwn hwnj roxnaeuz guh hong daiq baeg seiz binghcingz engq gyanaek. Mwh dungx doekduiq youqgaenj seiz lij buenx miz daep、mak、gezcangz daengj hix gaenriengz doekduiq.

Rongzva lot duiq. Rongzva baez lot okdaeuj doekduiq, bak conghced couh yungzheih deng ganjyenj, caemhcaiq rox baenz gunghgingjyenz dem.

Lwedhaw. Yingzyangj mbouj doxdaengh yungzheih hawj diet、yezsonh、veizswnghsu B12 daengj caux lwed doxgaiq gemjnoix, ndigah dungxsaej yindung haemq menh, veisonh iemqok hix noix, yingjyangj supsou yingzyangj doxgaiq, neix caemh dwg aen yenzyinh cauhbaenz lwedhaw haenx.

Geiqsingq doekdaemq. Aen’uk guhhong cujyau baengh youzlauz, gwn daiq noix sup haeuj youzlauz couh noix, yingzyangj ndaw ndang noix lai, sibauh aen’uk sonjsaet youqgaenj, cigciep yingjyangj daengz geiqsingq, ndigah ciengzseiz rox lumzlangh saehcingz.