Gaenh bi daeuj, Cingsih Yen roengzrengz damqra gij bingzdaiz cienz siusik de, gonqlaeng dajcaux densi Vahcuengh、gvangjbo Vahcuengh, gij siusik densi nem gvangjbo de cienz doh ndaw yienh, gig ndei dwk henhoh nem hungzyangz gij vah minzcuz nem vwnzva conzdungj dangdieg, hah ndei gij dieg daeuz fatsing gangjvah, hawj gij lusen、fuengcim、cwngcwz dangj raeuz ndaej cienz doh daengx yienh.

Densi Vahcuengh vunzlai gyaez- maij. Dangqnaj Cingsih Yen Densidaiz hai aen lanzmuz ndeu heuhguh《Haeuxnaengj Haj Saek》, neiyungz miz《Sinhvwnz Vahcuengh》、《Hingh Mbanj Raeuz》(heiq mbanj raeuz)、《Denyingj Vahcuengh》、 《Gohgi Vahcuengh》、《Liengz Lauxsae Gangj Gojgaeq》、《Baijok Dinfwngz》daengj lanzmuz, moix ngoenz bo seiq diemj buenq cung. Densi Vahcuengh okmoq le gij fuengsik senhconz, yaek senh- conz giswngh、faplwd、fuengzre bingh- aiswh、ciubing daengj, cijaeu loegguh ndei senhconz swhliu, liuxle youq ndaw densi lanzmuz book, vunzlai mbouj ok rogranz couh rox liux lo. Dangqnaj, ndaw yienh youjsen densi anrag daengz daengx yienh doenghgij dieg daihgaiq miz 25 fanh vunz youq de, densi Vahcuengh souyawj beijlaeh beij lanzmuz wnq sang 8% doxhwnj, hai bo bi ndeu couh miz 3 fanh lai ranz gyahaeuj yienh youjsen densi vangjloz.

Gvangjbo Vahcuengh comz sim gyoeb rengz vunzlai. Gvangjbo Vah- cuengh moix ngoenz gungh bo cibroek diemj buenq cung, hah ndei gij dieg sang yizlun（ciemq ndei dieg fatsing gangjvah）de. Cezmuz miz sinhvwnz、saenqsik hong cwngfuj、vwnzyi Mbanj- cuengh、lizsij daengj neiyungz, aeu gij hingzsik vunzlai gyaezmaij de cienz siusik, hungzyangz vwnzyi dangdieg. Gvangjbo sinhau bo ok 50 goengleix gyae, cienz daengz gij dieg 40 lai fanh vunz youq de, gaenq baenz aen bingzdaiz senhconz fuengcim cwngcwz dangj raeuz、fuzvu vunzlai、swnjcienz nem henhoh vwnzva ndei Boux- cuengh lo. (Yangz Liujcingh Liengz Mingzcingh)