Dahyunghgyangh faen Namzningz baenz namz baek song gaiq, doenghbaez, ci caeuq vunz gvaq dah, ciuhciuh daihdaih cungj baengh ruz doz. Doeklaeng Dah Baihnamz Gunghyezyenz fazcanj caeuq vunz daengx si demlai, caiq gya hwnj Namzningz Si ci baebae dauqdauq yied daeuj yied lai, doxlienz gyaudoeng song haenz cix baenz aen vwndiz yienhda lo.

Veiz Gozcingh gig gvansim hwnjguh Giuzhung Yunghgyangh. Dwg de caeuq Cinz Yinggih caenndang yaengdingh giz dieghwnj. Seizhaenx Cinz Yinggih dwg boux suhgi faenguenj gunghyez Swcigih Dangjveij ndeu, youh dwg boux Swcigih Cwngfuj fucujsiz giem boux cujyin Goekdaej Gunghyez Gensez Veijyenzvei ndeu.

Sezgi Giuzhung Yunghgyangh, doiq gvangqdoh gwnzgiuz miz song cungj yigen mbouj doengz. Miz vunz cawjcieng guh baenz 18 maex cix baenz lo. Gij vunzgisuz gunghcwngz Guekgya Gyauhdunghbu caemh naeuz, youq ndaw guek raeuz guh diuzgiuz goengloh coengzlaiz mbouj mauhgvaq 18 maex. Cinz Yinggih daengj vunz cawjcieng lai gvangq di, guh baenz 24 maex.

Veiz Gozcingh dingjrengz 24 maex. De naeuz, Giuzhung Yunghgyangh dwg diuzroen youqgaenj ndeu, guh giuz caemh aeu naemj daengzcog fazcanj, aeu yawj ndaej gyae di. Gij gvangqdoh gwnzgiuz, gaej naeuz gaxgonq mbouj miz gvaq, seizneix cix mbouj ndaej miz. Gij gvangqdoh dwg ciuq gij aeu caeuq gij hajnaengz cix dingh okdaeuj, aengiuz neix youh dwg roenci, youh dwg roenvunzbyaij, songhenz aengiuz neix aeu louz 3 maex daeuj guh roenvunzbyaij, danghnaeuz guh baenz 18 maex nei, roenci cijmiz 12 maex, mbouj hab gij aeu daengzcog fazcanj haenx. De doengzeiq ciuq 24 maex guh sezgi, roenci 18 maex, gwnzgiuz ndaej hai gvaq aendanjgwz naek 60 dun haenx, lajgiuz ndaej doeng gvaq aenruz naek cien dun haenx. Gyauhdunghbu doeklaeng caemh doengzeiq aen yigen neix. Giuzhung Yunghgyangh dwg seizhaenx daengx guek aengiuz goengloh ceiq gvangq ndeu.

(caengz sat)