Cibngeih Gaiq Yinzda Ngeih Baez Veiyi、Daengx Guek Cwnghez Cibngeih Gaiq Ngeih Baez Veiyi faenbied youq 3 nyied 5 hauh、3 nyied 3 hauh youq Baekging hai. Vih guh ndei hong fanhoiz vwnzgen“song hoih”bineix, ndwencieng ngamq gvaq, Cunghgoz Minzcuz Yijvwnz Fanhyizgiz Sawcuengh Siz daengxcungq yinzyenz nem doenghboux lauxhangz fanhoiz daj gih raeuz gak dieg daeuj de, gungh 20 boux, rapdawz hong fanhoiz daihhoih vwnzgen baenz Sawcuengh. Gyoengqde ciuq anbaiz youq 2 nyied 20 hauh lajbyonghngoenz naengh feihgih daengz Baekging, caeuq doenghboux lauxhangz 6 cungj vah minzcuz wnq guhdoih, hainduj guh hong fanhoiz vwnzgen daihhoih caeuq caemh sing fanhoiz nem book.

Vih bauj yauliz sang、cizlieng ndei dwk guh ndei hong fanhoiz vwnzgen daihhoih, gibseiz dawz vwnzgen Sawcuengh hawj doenghboux daibyauj、veijyenz Bouxcuengh, Sawcuengh fanhoiz siujcuj doengz- caez caemhsim haenqrengz、gyaban gyarengz、cungj aeu lai ndei, ciuqseiz ciuqsoq guh sat fanhoiz vwnzgen daihhoih caeuq caemh sing fanhoiz nem book. Haihoih geizgan, gungh fanhoiz cwngfuj gunghcoz baugau、daengx guek yinzda cangzveijvei gunghcoz baugau、daengx guek cwnghez cangzveijvei gunghcoz baugau、ceigauh yinzminz fazyen gunghcoz baugau、ceigauh yinzminz genjcazyen gunghcoz baugau daengj daihhoih vwnzgen 87 faenh、32 fanh cih Sawgun, caemh sing fanhhoiz nem book 10 baez, vih bineix“song hoih”ndaej swnhleih ciuhai ok goengrengz lai lo.

(Cunghgoz Minzcuz Yijvwnz Fanhyizgiz Sawcuengh Siz)