Seizcin dwg aen geiqciet daj gyoet bienq raeuj ndeu, givwnh bienqvaq haemq daih, gyahwnj sigin daegbied dwg nengzbingh hainduj sanjmaj, baez ciemq haeuj ndang vunz le vunz couh yungzheih ndaej bingh. Ndigah, seizcin aeu lai gwn gijgwn hamz lai cungj veizswnghsu caeuq gvangvuzciz haenx. Veizswnghsu C ndaej dingj binghdoeg, aeu lai gwn byaekhau、lwgmanh、makyungz caeuq makgam、mak- cengz, lij aeu lai gwn byaek- gienjsim、byaekreuz, lij ndaej dem gwn raetmoegngaex ndaem、raetngaenz、raetmoguh、 raetrang daengj.

Seizcin dienheiq bienqvaq yungzheih hawj hezyaz bouxvunz swng sang, gwnndoet fuengzceih fuengfap miz: Moix ngoenz gwn 250 gwz gyoijhom; aeu 300 gwz byaekginzcai baek raemx gya di begdangz ndeu dang caz gwn; aendungx caeuq cibngeihcijcangz biux naeuh hix yungzheih youq seizcin fukfat, wng siuj gwn roxnaeuz mbouj gwn dang nohmou、dang nohgaeq、dang nohvaiz caeuq byaekbohcai. Ndaej aeu dangzrwi gek raemx naengj cug le youq mwh dungx byouq seiz gwn, moix ngoenz gwn 100 hauzswngh, baen 3 baez gwn liux. Binghmenhsingq hozgyawh in hix yungzheih youq seizcin fukfat, gwnndoet fuengzceih fuengfap dwg lai gwn gijgwn giep myaiz、cangq dungx、bouj mak、ciengx bwt ndeu, lumj lwgndae、makleiz、cehmbu、beghab、makdaihcauj、makhwzdauz、dangzrwi daengj, gij huq neix ndaej bangbouj gemj- mbaeu binghcingz.