Caz vagut: Vagut wng senj yungh gij vagut diemz, aeu gij vagut hau Suh Hangz okcanj haenx engq ndei. Moix baez aeu 3 gwz baedauq cimq raemxgoenj gwn, ngoenz gwn 3 baez. Hix ndaej aeu vagut caeuq vagimngaenz、ganhcauj caez baek raemx dang caz gwn, ndaej bingz daep singj da、cing ndat gaij doeg. Doiq boux baenz hezyaz sang caeuq boux baenz doenghmeg giet ndongj ywyauq gig mingzyienj.

Caz maksanhcah: Gij cwngzfwn maksanhcah ndaej bangcoh siuvaq、mbehai sailwed、gyangq hezdangz caeuq gyangq hezyaz. Ciengzseiz gwn caz maksanhcah, ndaej bangbouj yw hezyaz sang. Fuengfap dwg, moix ngoenz moix baez aeu aen daengz song aen maksanhcah ndip cimq raemxgoenj gwn, ngoenz geij baez.

Caz mbawngaeux: Cunghyih siz- cenj byaujmingz, gij raemx cimq mbawngaeux caeuq gij raemx baek de ndaej mbehai sailwed、cing ndat gaij hwngq、gyangq hezyaz caeuq gemj biz siu lauz. Mwh yw hezyaz sang seiz, aeu buenq mbaw ndip he ma swiq seuq ronq mienz, dwk di raemx he cawj goenj langh liengz dang caz gwn couh ndaej.

Caz mumh haeuxyangz: Mumh haeuxyangz mboujdanh ndaej gyangq hezyaz, caemh ndaej dingz siq、dingz lwed、leih nyouh、ciengx dungx. Ngoenz cimq geij baez gwn, moix baez 25 daengz 30 gwz. Boux aenvih sinyenz yinxhwnj baenz foegraemx、baenz hezyaz sang haenx gwn caz mumh haeuxyangz ywyauq ceiq ndei.