Seizcin wng ciengx daep guh goek. Vahsug naeuz:“Yw bouj mboujyawx gwn bouj.” Lajneix gaisau geij cungj seizcin gwn bouj fuengfap hawj vunzlai:

Gwn daep ciengx daep dwg gwn daepgaeq guh goek. Daepgaeq feih diemz singq raeuj, ndaej bouj lwed ciengx daep, caemhcaiq ndaej raeuj dungx. Gidij yunghfap dwg baenzneix: Aeu 3 aen daepgaeq singjsien, 100 gwz haeuxnaz doengzcaez cawj cuk gwn. Cungj cuk neix ndaej yw bouxcungnienz caeuq bouxlaux lweddaep mbouj gaeuq、amqbak mbouj ndei、lwgda gansaep roxnaeuz rih raemxda. Linghvaih, bouxlaux baenz gen ga mazmwnh seiz, ndaej aeu 5 aen daepgaeq, 20 gwz denhmaz, song yiengh caez naengj cug, ngoenz gwn baez ndeu, gwn buenq ndwen couh raen miz yaugoj.

Aeu feih bouj daep suenq meiq guh daeuz. Meiq ndaej bingz daep sanq cwk, gej doeg hanhhaed sigin sanjmaj. Bouxlaux baenz hezyaz sang yiengzdaep bien hoengh seiz, moix ngoenz ndaej gwn 40 hauzswngh raemxmeiq, heuz raemxraeuj gwn. Hix ndaej aeu duhhenj cimq raemxmeiq gwn, ywyauq gig ndei. Boux bingzseiz aenvih aeuqheiq baenz daep in, ndaej aeu 40 hauzswngh raemxmeiq, gya 10 gwz mba caizhuz heuz gwn, doq sikhaek dingz in.

Baujciz hailangh ciengzseiz lienhndang. Seizcin ciengx daep lij aeu baujciz simcingz hailangh, mbouj fatheiq mbouj aeuqheiq, siuj gwn laeuj lai gwn raemx. Ciengzseiz lienhndang ndaej hawj lwed ndaw ndang riuzdoeng ndei, ndaej bouj cukgaeuq yangjgi caeuq yingzyangj hawj aen’daep.