De naeuz:“Go faexfunghvuengz mbouj dwg gofaex ciengzheu, doengzseiz nanz re non haih bingh haih, vunzlai gig nyap de, gij faexfungvuengz yienh miz haenx yaek aeu gaij baenz lingh cungj bae.” Daihgya cungj haenhdoengz yigen de. Miz baez ndeu, de youq Gveilinz fatyienh cungj gofaex ndeu, maj ndaej mwncupcup, de haemq maij gofaex neix. Seizhaenx, Gveilinz Siveij suhgi Vangz Yinz naeuz de nyi, dingz faex neix heuh guh Gogviq Denhcuz, seiqgeiq cungj heu, dwg cungj gofaex ndei loegvaq ndaw singz haenx. De heuh vunzhong henzndang aeu bae bakdou ranz de sawq ndaem, dingz gofaex neix maj ndaej haemq ndei. Doeklaeng, ndaej de naeuz le, Namzningz Si caemh ndaem le haujlai Gogviq Denhcuz. De cawjcieng ndaw singz ndaem faex saedhengz loegvaq、meijvaq、homvaq、makvaq, gai haw baenz raemh, seizhah byaij loh ndaej dangj ndit, roeg raez va hom, hoengqheiq singjsien.

Bi 1965 nienzdaej, Veiz Gozcingh daj diegrog liuzyangj dauqma, canghyw heuh de doq guh hong doq yw bingh, hoeng de youq hoengq mbouj ndaej, ciuq misuh de Vangz Nensenh geiqloeg, bi 1966 ndwen 1 gwnz byonghndwen, de roengz gihcwngz bae 7 baez, ndawde miz 4 baez caeuq loegvaq mizgven.

Ngoenzyenzdan ngoenzhaenx, de iu Cinz Yinggih、Lij Yinhdanh、Cungh Fungh、Siuh Hanz、Ho Yiyenz、Yangz Yungzfeih geij boux bae daengz Liengzfunggyangh, liujgaij gij saeh cauh ndoeng baihde.

Ndwen 1 ngoenz 10 lajbyonghngoenz, de daiq Siuh Hanz、Veiz Cunzsuz song boux lingjdauj Namzningz Si neix, bae gaujcaz gij vwndiz ndaem faex song henz roen ndawsingz doeng coh Sihyanghdangz haenx. De naeuz, diuz roen neix caeuq diuz roen ndawsingz doeng coh Vuzhih Feihgihcangz haenx, aeu guh baenz diuz roen byauhcnnj sang Namzningz Si haenx. De gidij daengq naeuz, Sihyanghdangz diuz roen neix song henz aeu gak ndaem sam hangz faex, hangz daih’it ndaem gogviq denhcuz, hangz daihngeih ndaem faexnyawhlanz, hangz daihsam ndaem faexanh roxnaeuz gofaex wnq, gvigek dwg 4 × 6 goengcik. Yienghneix, gofaex majhung le cix baenz baihnaj daemq, baihlaeng sang, caezcup ndeiyawj, yawj gvaqbae roen youh yienhndaej gvangq, mbouj yingjyangj bouxhaici yawj roen.

(caengz sat)