Ngoenzneix gou cazyawj saehaexma, gou yawj bae yawj dauq, ndaw sim caeux couh naemj saehaexma baenzlawz diemheiq? Saehaexma gwn gijmaz? Saehaexma miz mbouj miz ga, vih gijmaz de rox raih? Ndigah gou aeu ndeindei cazyawj mbat he.

Soujsien gou siengj rox saehaexma gwn gijmaz? Gou dwk duz saehaexma roengz aen bingz he bae, yienzhaeuh cuengq geij duz nyungz caeuq di mienhbau soiq haeujhae, lij cuengq geij mbaw byaek, seizneix saehaexma menhmenh nod bae coh mbawbyaek,yienzhaeuh hainduj gwn hwnjdaeuj, gou rox lo, laxlawz saehaexma maij gwn mbawbyaek. Aen vwndiz daihngeih dwg saehaexma miz mbouj miz ga, de vihmaz rox raih? Gou dwk saehaexma roengz aen cenj daeuqmingz he bae, sijsaeq cazyawj, laxlawz saehaexma dwg yungh laj dungx de daeuj nod. Ciep roengzdaeuj dwg saehaexma baenzlawz diemheiq? Gou bae cam daxboh, daxboh naeuz:“Gwnz ndang saehaexma miz aen congh he, de couh dwg yungh congh haenx diemheiq.” Gou youq gwnz ndang de ra raen aen congh haenx, laxlawz de dwg yungh aen congh neix diemheiq. Gvaq yaep he, gou fatyienh saehaexma ninz lo, gou siengj hawj de ndiu, hoeng gou mbouj rox baenzlawz cij naengz hawj de ndiu, gou youh bae cam daxboh, daxboh naeuz:“Mwngz cuengq de roengz raemx bae.” Gou cuengq duzde roengz raemx bae, duzde menhmenh ndiu lo, yienzhaeuh bin okdaeuj.

Saehaexma caen miz yinx, gou maij cazyawj saehaexma!

(Maj Ya)