Mwh gou doeg sam nienzgaep, gou miz boux doengzhag he heuh Suengbauj. De miz baez he daiq bak maenz ngaenz he bae hagdangz, hoeng de bae diengzhaex seiz dwk ngaenz doek roengz gumzhaex bae lo. Diengzhaex hagdangz lajmbanj sou rox lwi? Couhdwg aen gumz he. De doek ngaenz le ma naeuz hawj dou, ndigah dou bae bang de gip. Dou daengz diengzhaex le, raen gumz daiq sang fwngz iet mbouj daengz gip mbouj ndaej. Seizneix Sez Fuz naeuz:“Baihlaj miz aen bakdou he, dou daj gizhaenx haeujbae gip ngaenz.” Gvang Ginh naeuz:“Mwngz lwg fatbag neix, mwngz caij haex haeujbae gip ha?” Sez Fuz naeuz:“Hix dwg bw, yienghneix sou naeuz baenzlawz guh?” Gvang Ginh naeuz:“Dou aeu gaiq benj he gangq gvaqbae guh giuz ndaej lwi?”“Ndaej ha, dou bae ra benj ba.”Gou naeuz. Gvaq yaep ndeu giuz dap baenz lo. Sez Fuz naeuz:“Byaij, dou gvaqbae gip ngaenz.”Dou gvaqbae seiz gig swnhleih, hoeng dauqma seiz, benj raek lo, dou geij boux doek roengz gumz haex bae. Gij haeu haenx ha, caen mbouj miz banhfap gangj lo. Vihliux gip bak maenz ngaenz neix, caen aeu mingh ha.

(seiq nienzgaep Sez Yenzgij)