Gaenh bi daeuj, Nazboh Yen Cwngzsiengh Cin daihlig fazcanj buek daegsaek youhsi nungzyez canjyez hanghmoeg he, doenggvaq gveihva dazyinx、cwngcwz cihciz、lungzdaeuz daiqdoengh daengj banhfap, gyavaiq hawj conzdungj nungzyez bienq yienhdaih nungzyez, hawj daegsaek dajndaem dajciengx baenz diuz roen moq hawj saujsu nungzminz laisou haenx.

Miz hawciengz couh miz yauyiz ndei, Cwngzsiengh Cin fazcanj daegsaek nungzyez canjyez aeu hawciengz guh fuengyiengq, daihlig saedhengz“it mbanj it yiengh” canloz, ciuq dieg laebguh le“makdauz hoengz、vagimngaenz、mbawien、faexcuk、mouseng、gaeqndaem、cwzndei”daengj cujdauj nungzyez canjyez, caemhcaiq yinxhaeuj makleiz、gaeqhojgih daengj canjyez hanghmoeg moq. Aen cin neix youhva canjyez gezgou, vanzlij ciuq aen mozsi“gunghswh+hezvei+nungzhoh”neix, youq daigvanj、gisuz bangcoengh daengj fuengmienh dingh le buek youhvei cwngcwz ndeu, daihlig bangfuz lungzdaeuz giyez fazcanj, youz lungzdaeuz giyez camgya gak canjyez hezvei guenjleix, caiq youz gij canjyez hezvei neix dungjyiz cijdauj nungzhoh guh hong gisuz nem gaicawx, coicaenh daengx cin daegsaek dajndaem dajciengx bienqbaenz le gij dijhi cug caengz guenjleix ndei.

Ciuq cam rox, dangqnaj, daengx cin fazcanj nungzyez lungzdaeuz giyez 2 aen, gak loih daegsaek dajndaem dajciengx canjyez hezvei 15 aen, daengx cin makdauz hoengz、vagimngaenz、mbawien、faexcuk、makleiz、cazyouz daengj daegsaek dajndaem menciz dabdaengz 1.5 fanh moux, daegsaek dajciengx nungzhoh dabdaengz 0.5 fanh hoh. Bi’gvaq dan buenq bi gonq, daegsaek dajndaem dajciengx cungjcanjciz mauhgvaq 1.1 ik maenz, bingzyaenz moix boux demhaeuj 2200 lai maenz.

(Guj Haijcouh)